Памежнікі Польшчы заявілі пра спробу сілавога прарыву мяжы і дасталі з балота чатырох мігрантаў
Польская памежная ахова за аўторак зарэгістравала 29 спроб парушэння мяжы мігрантамі з боку Беларусі.
Каля апоўначы ў раёне Чарэмхі была зробленая сілавая спроба прарыву праз мяжу. У ёй удзельнічала каля 40 чалавек. У польскіх служачых ляцелі камяні. Удзельнікі прарыву былі затрыманыя і аказаліся грамадзянамі Ірака і Сірыі, піша REFORM.by.
У той жа час польскія памежнікі разам з ратавальнікамі дасталі з балота чатырох мігрантаў. Грамадзяне Ірака і Сірыі загразлі ў дрыгве ў раёне адказнасці застаў у Міхайлаве і Нараўцы.
Пацярпелых выявілі з дапамогай дрона. Іх выцягнулі з балота. Двое мігрантаў шпіталізаваныя.
