Польшча закрывае свае межы для замежнікаў
Польшча ўводзіць стан эпідэміялагічнай пагрозы. Поўны кантроль на ўсіх межах Польшчы. Апрача ўсходняй мяжы ўводзяцца таксама спецыяльныя захады на ўнутранай мяжы з краінамі Еўразвязу.
Польшча прыпыняе на 10 дзён уезд замежных грамадзян на тэрыторыю краіны. Забарона ўступае ў сілу ў бліжэйшы час з нядзелі, 15 сакавіка 2020 года.
– Мне вельмі прыкра паведаміць вам, што мы ўводзім новае правіла: калі вы не грамадзянін нашай краіны, гэта не час для паездак, для наведвання сяброў, – сказаў кіраўнік МУС і адміністрацыі Марыюш Каміньскі.
Прэм’ер-міністр Матэвуш Маравецкі адзначыў, што харчоў у Польшчы хапае. Усе прадуктовыя магазіны і банкі будуць працаваць у звычайным рэжыме.
Польскія грамадзяне, якія знаходзяцца за мяжой, па прыездзе ў Польшчу павінны будуць прайсці каранцін працягласцю 14 дзён.
Рух тавараў праз мяжу захаваецца.
У Польшчы таксама прыпыняецца дзейнасць пабаў, кавярняў, клубаў і бараў.
З нядзелі будуць прыпыненыя авіязносіны акрамя тых, якія неабходныя для вяртання грамадзянаў з-за мяжы. Уводзяцца жорсткія працэдуры на мяжы, каб прадухіліць патрапленне ў краіну асоб інфікаваных каронавірусам.
Беларускае Радыё Рацыя
