Польскі парапланерыст усё яшчэ знаходзіцца ў Беларусі
Парапланерыст з Беластока, які на параплане нелегальна перасёк польска-беларускую мяжу, па-ранейшаму знаходзіцца на тэрыторыі Беларусі.
Беларускі памежны камітэт ужо прыняў рашэнне пра дэпартацыю і штраф у памеры 450 базавых велічынь.
Штраф аплачаны, аднак 26-гадовы беластачанін па-ранейшаму не перададзены польскай памежнай службе, паведаміў генеральны консул Польшчы ў Гародні Анджэй Хадкевіч:
– Быў прадстаўлены нейкі аргумент, якога я не разумею з пункту гледжання польскай працэдуры, што сёння няма начальніка адрэзка мяжы палкоўніка Маластова. Не ведаю, што толькі начальнік можа падпісаць рашэнне? Ніхто яго не замяшчае? Не разумею гэтага.
26-гадовы беластоцкі парапланерыст быў затрыманы па беларускім баку мяжы ў раёне вёскі Нязбодзічы ў Свіслацкім раёне. Паводле маладога чалавека, ён у паветры згубіў арыентаванне па мясцовасці і апынуўся ў Беларусі.
Зміцер Косцін, Беларускае Радыё Рацыя
