Польскія мытнікі выкрылі кантрабанду ў 90 тыс. пачак цыгарэт
Самая вялікая кантрабанда цыгарэт у гісторыі памежнага перахода ў Семяноўцы выкрытая супрацоўнікамі Падляшскай мытнай службы. 90 тыс. пачак цыгарэт, прыблізны кошт якіх складае больш за 1 млн злотых, мытнікі выявілі ў вагонах з цэментам.
Падчас кантролю цягніка, які ехаў з Беларусі ў Польшчу, мытнікі заўважылі пашкоджаныя замкі люкаў на трох вагонах, у якіх паводле дакументаў павінен быў знаходзіцца цэмент.
Пасля адкрыцця загрузачнага люка і ўвядзення зонда ў цэмент, на дысплеі прылады з’явіліся скрыні абгорнутыя ў чорны цэлафан. Як высветлілася, у іх былі беларускія цыгарэты.
Усяго мытнікі з Семяноўкі знайшлі ў трох вагонах з цэментам 90 тысяч пачак цыгарэт, арыентыровачны рынкавы кошт якіх перавышае 1 мільён злотых.
Па факце кантрабанды цыгарэт Мытная служба пачала расследаванне, якое вядзецца пад кіраўніцтвам пракуратуры ў Гайнаўцы. Былі дапытаныя машыністы цягніка. Супрацоўнікі мытні высвятляюць паходжанне цыгарэтаў і да каго яны павінны былі трапіць.
За такую вялікую кантрабанду цыгарэт пагражае пазбаўленне волі да 10 гадоў.
