Польскія мытнікі выкрылі кантрабанду вартую 9 мільёнаў злотых
Супрацоўнікі Нацыянальнай падатковай адміністрацыі спынілі на польска-беларускім памежным пераходзе ў Кузніцы фуру, якая паводле дакументаў, павінна была перавозіць палеты з дошкамі.
Падчас агляду грузавіка, якому папярэднічала праходжанне рэнтгену, высветлілася, што ў прычэпе ў спецыяльна падрыхтаваных скрынках, якія імітуюць паддоны з дошкамі, была схавана кантрабанда цыгарэт.
Яго разгрузка і дакладны падлік занялі суткі. Усяго ў грузавіку, якім кіраваў 28-гадовы беларус, знаходзілася 600 тысяч пачак цыгарэт на суму амаль 9 мільёнаў злотых.
У дачыненні да кіроўцы пачата расследаванне, якое кантралюецца раённай пракуратурай Саколкі. Суд пастанавіў часова арыштаваць мужчыну на тры месяцы.
За такую колькасць кантрабанды цыгарэт яго могуць пазбавіць волі на тэрмін да 10 гадоў.
