Працягваецца змаганне за Цэнтр Заменгофа ў Беластоку
Амаль 1400 подпісаў супраць ліквідацыі Цэнтра імя Заменгофа ў Беластоку сабралі прадстаўнікі “Грамадзянскай платформы” і “Маладыя дэмакраты”.
Подпісы разам з праектам пастановы пра адмену рашэння пра ліквідацыю цэнтра яны падалі ў магістрат. Цяпер чыноўнікі прэзідэнта горада Тадэвуша Трускаляскага маюць тры месяцы на тое, каб разгледзець праект і паставіць яго на галасаванне на пасяджэнні ўправы горада.
Паводле Паўла Якімюка з “Маладых дэмакратаў”, ініцыятары збору подпісаў адчулі вялікую падтрымку з боку жыхароў Беластока:
– Шмат асобаў вельмі актыўна ўключыліся ў гэта, нават забіралі лісты дадому, падпісвалі іх і прыносілі пасля нам. Я веру ў тое, што сабраныя намі подпісы не будуць праігнараваныя і штосьці зменіцца ў справе Цэнтра імя Заменгофа.
З пачатку 2017 года Цэнтр Заменгофа перастане існаваць. У сотую гадавіну смерці найбольш вядомага беластачаніна – стваральніка мовы эсперанта – цэнтр, які носіць яго імя, будзе ўключаны ў Беластоцкі асяродак культуры.
Лукаш Леанюк, Беларускае Радыё Рацыя, Беласток
Фота kajar.eu
