Прэм’ер-міністр Польшчы: Мы маем справу з падрыхтаванай у Менску і Маскве акцыяй
Толькі ў верасні былі зафіксаваныя каля 4 тысяч спробаў незаконнага перасячэння польска-беларускай мяжы. Гэта значна больш, чым у жніўні. Агулам за два апошнія месяцы былі зафіксаваныя каля 7 тысяч такіх спробаў. Мы маем справу з масавай, добра падрыхтаванай у Менску і Маскве акцыяй, заявіў прэмʼер Матэвуш Маравецкі падчас прэс-канферэнцыі пасля сустрэчы з кіраўніцтвам Памежнай службы.
Матэвуш Маравецкі паведаміў таксама пра смерць трох чалавек, якія незаконна перасеклі польска-беларускую мяжу. Раней пра гэта інфармавала таксама Памежная служба:
– У выніку пераахаладжэння і знясіленыя цяжкімі ўмовамі памерлі трое мігрантаў. Мы стараемся дапамагаць усім, выяўленым на тэрыторыі Польшчы нелегалам. Часта мы знаходзім іх на балотах, у лясах, у цяжкадаступных месцах. Надоечы мы выратавалі восем такіх асобаў, якія блукалі па балотах ракі Супрасьль.
Кіраўнік ураду дадаў, што польская дзяржава зробіць усё магчымае, каб памерлыя не засталіся ананімнымі і былі годна пахаваныя. Матэвуш Маравецкі не сумняецца, што мы маем справу з акцыяй, якая павінна дэстабілізаваць сітуацыю на мяжы ЕС.
