Рэлігійныя вершы ды песні прагучалі ў Сямятычах
У Сямятыцкім цэнтры культуры адбыўся «Вечар дэкламаванай і спяванай рэлігійнай праваслаўнай паэзіі». На сцэне з калядным рэпертуарам паказалі сябе дзеці ды моладзь з Сямятыччыны. Сярод іх была Кацярына Цераховіч, якая дэкламавала творы:
– Гэта два вершы: Іван Бунін «Любил я в детстве» і Аляксандр Блок «Девушка пела в церковном хоре». Гэтыя вершы не было складана вывучыць, бо я люблю замежныя мовы.
Юлія Давідзюк:
– Я спявала песню, якая называецца «Цырульнік». Гэта песня пра цырульніка, які не верыць у Бога, але, як аказалася, усё насамрэч не так, як ён думаў. Я спяваю ў царкоўным хоры, але тут спяваю ўпершыню.
Падчас падзеі таксама адкрылі выставу святочных упрыгожанняў, выкананых вучнямі мясцовых пачатковых школаў, гімназіяў ды ліцэяў. Галоўным арганізатарам імпрэзы выступіў Дэканальны інстытут праваслаўнай культуры ў Сямятычах.
Мацей Рацінеўскі, Беларускае Радыё Рацыя, Сямятычы
Фота аўтара
Глядзіце таксама
