Штовечар беларусы збіраюцца ля брамы консульства ў Беластоку
Чарговая акцыя пратэсту прайшла ў абмеркаванні таго, што адбываецца ў Беларусі. Дзяржаўным СМІ беларусы даўно не вераць.
У альтэрнатыўных жа мажлівасці былі абмежаваныя ў сувязі з адсутнасцю інтэрнэту. Сёння, дзякуючы таму, што інтэрнэт з’явіўся і многія людзі пачулі сваіх родных, яны былі ўражаныя бесчалавечнасцю ўлады. Не думаць і не гаварыць пра гэта немажліва, кажуць удзельнікі акцыі Ганна і Павел:
– Я прасынаўся ноччу, лез у інтэрнэт, каб паглядзець, што там адбываецца.
– Сяброўка, што працуе на “хуткай дапамозе”, расказвае, што яны не спяць начамі. Што бальніца хуткай дапамогі перапоўненая раненымі. Гэта страшна.
Палякі і прадстаўнікі беларускай нацыянальнай меншасці ў Польшчы таксама пастаянна далучаюцца да грамадзянаў Беларусі ў падобных акцыях. Не стала выключэннем і гэтая. Кажа Алег Латышонак:
– Мы, беларусы польскія, – таксама беларусы і вельмі перажываем і хвалюемся з-за таго, што адбываецца ў Беларусі. Ніколі для нас гэта не была чужая краіна. Тое, што мы бачым, гэта жах! Але самае важнае, што народ прачнуўся. Я ніколі такога не адчуваў, што маладыя беларусы так за свабоду заступяцца. Заўсёды нас лічылі такімі пакорлівымі. Аказваецца, што мы ўмеем змагацца за сваю свабоду!
Акцыі дзеля падтрымкі суайчыннікаў-змагароў плануецца і надалей праводзіць штовечар ля брамы кансулята, паведаміла арганізатарка Марына Ляшчэўская.
Ганна Комінч, Беларускае Радыё Рацыя, Беласток
