Спынена спроба ўвозу з Польшчы буйной партыі наркотыкаў
11 красавіка ў пункце пропуску «Дамачава» берасцейскія пагранічнікі прадухілілі ўвоз у Беларусь буйной партыі рэчыва расліннага паходжання.
28-гадовы жыхар Берасцейскага раёна вяртаўся з замежнай паездкі і выбраў «зялёны» канал, тым самым заявіўшы аб тым, што не мае тавараў, якія падлягаюць дэклараванню. Падчас праходжання пагранічнага кантролю службовы сабака адрэагаваў на яго іншамарку. Пагранічнікамі было прынята рашэнне аб правядзенні спецыяльнага дагляду аўтамабіля сумесна з супрацоўнікамі мытні ў асобным боксе.
У выніку пагранічны нарад сумесна з мытнікамі ў багажным аддзяленні «Volkswagen» выявіў тайнік, у якім знаходзіліся 12 прамавугольных брыкетаў з рэчывам расліннага паходжання агульнай масай 92 кілаграмы. Згодна з заключэннем экспертаў, гэта – небяспечны наркатычны сродак – гашыш. Наркотыкі канфіскаваныя супрацоўнікамі органаў пагранічнай службы.
12 красавіка ў дачыненні да грамадзяніна Беларусі, які незаконна перамяшчаў праз мытную граніцу Еўразійскага эканамічнага саюза дадзеную партыю наркотыкаў, распачата крымінальная справа па частцы 2 артыкула 328-1 Крымінальнага кодэкса Рэспублікі Беларусь.
Глядзіце таксама
