„Świat”: Забойцы забралі частку скальпа з галавы Балаховіча
11 чэрвеня 1923 года, паводле іншых дадзеных уночы з 12 на 13 чэрвеня, едучы па дарозе з Гайнаўкі ў Белавежу, быў забіты беларускі вайсковы дзеяч Язэп Булак-Балаховіч.
Польскі часопіс „Świat” №28 (14 ліпеня 1923) прысвяціў яму ілюстраваную публікацыю:
– „У 448 квартале пушчы, каля гары Стэфана Баторыя, у першай палове чэрвеня было здзейснена, праўдападобна бальшавіцкай рукой, ганебнае злачынства. Быў забіты ціхі і спакойны лясны рабочы, а ў часы польска-бальшавіцкай вайны заслужаны генерал Язэп Булак-Балаховіч, брат вядомага камандзіра саюзных з намі добраахвотніцкіх аддзелаў Станіслава Булак-Балаховіча, у якога займаў пасаду кіраўніка штаба”.
„На нашай ілюстрацыі прадстаўлены труп генерала Язэпа Балаховіча, чэрап якога з двух бакоў прастрэлены, а левае вока разбіта колам воза. Вельмі характарыстычны і таямнічы момант забойства – гэта адсутнасць кавалка чэрапа з валасамі. Існуе меркаванне, што забойцы забралі частку скальпа з галавы Балаховіча як доказ таго, што быў забіты не хтосьці іншы. Абставіны злачынства ўказваюць на тое, што яно было палітычным”, – паведамлялася ў артыкуле.
Язэп Булак-Балаховіч (1894-1923) – беларускі вайсковы дзеяч, афіцэр пяхоты арміі Расейскай імперыі, палкоўнік Белай арміі, намеснік камандзіра добраахвотніцкіх атрадаў у складзе польскай арміі ў 1920 г., удзельнік антыбальшавіцкай барацьбы ў 1918-1920 гадах.
Аляксей Трубкін, Беларускае Радыё Рацыя
Глядзіце таксама
