У Польшчы адзначаюць Нацыянальны дзень памяці „выклятых жаўнераў”
У Польшчы сёння адзначаюць Нацыянальны дзень памяці „выклятых жаўнераў”. Дзяржаўнае свята адзначаецца з 1 сакавіка 2011 года ў гонар жаўнераў польскага вызваленчага і антыкамуністычнага падполля. У сувязі з пандэміяй сёлета ў Беластоку не будзе афіцыйных урачыстасцяў і Маршу памяці „выклятых жаўнераў”.
Сёння раніцай маршалак Артур Касіцкі і Багуслаў Дэмбскі, старшыня Сейміку, ушанавалі памяць жаўнераў, усклаўшы кветкі і вянкі да памятных месцаў.
Найбольш вядомым „выклятым жаўнерам” з’яўляецца ротмістр Вітольд Пілецкі. Ён быў увязнены ў канцлагер Аўшвіц, дзе стаў арганізатарам руху супраціву. Аўтар сведчанняў пра Халакост. Пасля быў камуністычнымі ўладамі Народнай Польшчы абвінавачаны і прыгавораны да смяротнага пакарання. Расстраляны ў 1948 годзе.
У лік „выклятых жаўнераў” уключаныя таксама жаўнеры сумнавядомых на Падляшшы Рамуальда Райса “Бурага” і маёра Зыгмунта Шэндзеляша “Лупашкі”. Аддзяленні польскага ўзброенага падполля адказныя за пацыфікацыю беларускіх вёсак на Падляшшы ў 1946 годзе і смерць праваслаўных вазакоў. Менавіта „Бурага” і „Лупашку” праслаўляюць крайнеправыя сілы, якія ўжо некалькіх гадоў запар ладзілі ў Гайнаўцы Маршы памяці „выклятых жаўнераў”.
Беларускае Радыё Рацыя
Фота: wrotapodlasia.pl
Глядзіце таксама
