У Польшчы пройдзе масавая забастоўка настаўнікаў
У панядзелак 8 красавіка пачнецца забастоўка настаўнікаў па ўсёй Польшчы. На такі крок яны вымушаныя пайсці ў сувязі з тым, што іх патрабаванні ігнаруюцца.
Цягам апошніх 5 гадоў было праведзена 11 пратэстаў.
Размовы з урадам не прынеслі вынікаў, а змены ў адукацыі і фінансаванні прывялі да крызіснай сітуацыі, кажа прэзідэнт падляшскай акругі Саюза польскіх настаўнікаў Анджэй Грыгуць:
– Справа праграмы, справа бюракратызацыі, таксама вельмі істотная справа для самаўрадаў, як і для бацькоў, фінансаванне асветы ў польскай сістэме. Самаўрады шмат у якіх выпадках, не тое што дакладаюць, але не маюць на далейшае дакладанне, разам з гэтым прыстасаванне школ да так званай рэформы спадарыні Залескай. Кажу так званай, бо насамрэч гэта хаос і разбурэнне таго, што яшчэ дагэтуль добра функцыянавала.
Каля 600 тыс людзей, 16 тысяч з 20 тысяч навучальных устаноў па ўсёй Польшчы далучацца да забастоўкі, а гэта 80% агульнай колькасці:
– Няма іншага шляху, калі не можам размаўляць, калі нас ігнаруюць, то канцом гэтага будзе забастоўка. Калі ідзе пра Падляшскае ваяводства, то 377 школ і навучальных установаў выразіла гатоўнасць да пратэсту. Гэта 71% усіх школ і навучальных установаў на тэрыторыі ваяводства. У Беластоку яшчэ больш – амаль 88%, гэты чыннік вельмі высокі.
Удзельнікі пратэсту арганізуюць бестэрміновы пратэст, бо досвед апошніх месяцаў перамоваў паказвае на тое, што ўрад не ўспрымае сур’ёзна патрабаванняў працаўнікоў адукацыі. Праблемы не вырашаюцца, а да гэтага часу праходзіла толькі так званая медыяльная гульня.
Улады Беластоку прынялі бок навучальных установаў і супрацоўнікаў адукацыі, якія плануюць пачаць у панядзелак забастоўку. Да забастоўкі далучаюцца больш за 80%, навучальных устаноў Польшчы. Пратэст, несумненна, можа стварыць хаос.
Кажа намеснік прэзідэнта Беластоку Рафал Рудніцкі:
– У выпадку тых, што трапяць у школы, трэба будзе арганізаваць заняткі. Мы маем базу асобаў, якія дадаткова змогуць дапамагчы – гэта асобы з нашых установаў, якія трапяць у асобныя школы ў якіх найбольшая праблема з апекай над дзецьмі і моладдзю. Частка дзяцей і моладзі застанецца ў хаце і магчыма захоча бавіць час на вуліцы. Супольна з паліцыяй і гарадской аховай мы арганізоўваем школьныя патрулі, якія будуць функцыянаваць у горадзе.
Муніцыпальная паліцыя таксама арганізуе сустрэчы са школьнікамі, а ўлады горада будуць прыцягваць да апекі над дзецьмі гарадскія культурніцкія ўстановы. Прэзідэнт Беластоку дазволіў працаўнікам гарадской управы прыходзіць пад час страйку на працу разам з дзецьмі і заклікаў далучыцца да гэтай прапановы іншыя ўстановы горада.
Мілана Вераснёва, Беларускае Радыё Рацыя
