74-я гадавіна трагедыі ў Залешанах
Віцэ-маршалак польскага Сейму ўсклаў вянок да помніка бязвінна закатаваным жыхарам Залешанаў у 74-ю гадавіну трагедыі.
Сёння ў Залешанах прайшла чарговая малітоўная сустрэча па ўшанаванні трагічна загінулых жыхароў вёскі ад рук польскага антыкамуністычнага падполля. У гэтым годзе апрача жыхароў і шматлікіх мясцовых дэлегацыяў прысутнічаў і віцэ-маршалак Сейму Уладзімір Чажасты:
– Лічу, што памяць належыць бязвінна забітым, а забойцы застаюцца забойцамі. Так Бог хацеў і жыццё хацела, каб я стаў маршалкам. Лічу, што мая прысутнасць тут, як віцэ-маршалка, паслужыць людзям.
Апрача віцэ-маршалка ў Залешанах прысутнічалі таксама дэпутаты ад Падляшша Яўген Чыквін і Павэл Крутул. Традыцыйна ўжо ўсклалі вянок прадстаўнікі партыі “Разам”, дэлегацыю ўзначаліў цяпер ўжо дэпутат Сейма Адрыян Зандбэрг:
– Прашу трактаваць нашу прысутнасць тут, як голас польскіх парламентарыяў. А наконт пазіцыі ўраду магу сказаць толькі тое, што будучы левы ўрад не будзе мець сумневаў, як у гэтай справе сябе паводзіць.
29 студзеня 1946 года аддзел польскага ўзброенага падполля пад камандаваннем капітана Рамуальда Райса, псеўданім “Буры” спаліў вёску, забіўшы тут 16 цывільных жыхароў, у тым жанчын і дзяцей. Падчас сённяшніх урачыстасцяў адбылося асвячэнне адноўленага помніка ў вёсцы.
Валя Лаеўская, Беларускае Радыё Рацыя
* * *
„Зло ў Залешанах застанецца пакуль вінаватыя ў злачынстве застаюцца ў нашай краіне героямі”, – кажа нашчадак залешанскіх ахвяраў Марыюш Нічыпарук.
29 студзеня 1946 аддзел польскага ўзброенага падполля спаліў вёску Залешаны, дзе загінула 16 чалавек, сярод якіх жанчыны і дзеці. Кожны год у Залешанах моляцца за бязвінна загінулых:
– З 1995 года зло застаецца, бо з таго часу выканаўцы, якія здзейснілі чын, які нельга і блізка параўнаць з жаўнерскім абавязкам, яны сёння з’яўляюцца героямі нашай дзяржавы.
Напярэдадні каля адноўленага помніка ў Залешанах дэлегацыя з Беларусі, якую ўзначаліў намеснік старшыні Савета Рэспублікі Анатоль Ісачэнка, усклалі вянкі.
Адказны за злачынства ў Залешанах Рамуальд Райс „Буры” быў прыгавораны да смяротнага пакарання. У 1995 годзе вайсковы суд Варшавы адмяніў смяротны прысуд абгрунтаваўшы дзеянні „Бурага” барацьбой за незалежнасць Польшчы.
Беларускае Радыё Рацыя
Глядзіце таксама
