Украіна святкуе Першае траўня (абноўлена)
Ва Украіне працягваюцца святкаванні Першага траўня. Як і чакалася, не абыйшлося без правакацый.
У Кіеве колькі сотняў мясцовых камуністаў на чале з Пятром Сіманенкам сабраліся на мітынг каля музея Вялікай Айчынай вайны. Ім супрацьстаялі праўкраінскія актывісты. Падчас спрэчкі галоўнага ўкраінскага камуніста аблілі кефірам. Хулігана затрымала міліцыя, сам Сіманенка ўцёк, у выніку мітынг так і не адбыўся.
У прыфрантавым Харкаве, дзе ўсе масавыя акцыі на 1 траўня забароненыя праз суд, група пенсіянераў паспрабавала арганізаваць мітынг пад лозунгамі “Мир, труд, май!», “Да здравствует Советский Союз!” і “Слава России!”. У выніку адбылося колькі сутычак з прадстаўнікамі “Грамадскай варты Харкава”. Пасля з’яўлення праваахоўнікаў пенсіянеры разыйшліся.
* * *
Ці не большасць украінцаў у гэтыя дні выправілася на лецішчы, каб працаваць на градах. Але ж шмат хто збіраецца адведаць святочныя мерапрыемствы, запланаваныя ў буйных гарадах. Украінскія ўлады асцерагаюцца тэрарыстычных актаў і правакацый.
Так, сёння кіеўскіе камуністы паабяцалі правесці шэсце ў цэнтры сталіцы, а актывісты грамадскай арганізацыі “Правы сектар” – перашкодзіць ім гэта зрабіць. Падобныя канфлікты могуць выбухнуць і ў іншых гарадах, асабліва ў Адэсе і Харкаве. Міліцыя і спецслужбы краіны прыведзеныя ў стан найвышэйшай гатоўнасці.
Паводле кіеўскіх уладаў, сёлетні Першамай стане ці не самым напружаным за ўвесь час яго святкавання ва Украіне.
Для Беларускага Радыё Рацыя – Марцін Война, Украіна
Глядзіце таксама
