Урачыстасці з нагоды 200-годдзя царквы ў Пяценцы
7 ордэнаў Марыі Магдалены і адзін ордэн Кірыла і Мефодзія атрымалі прыхаджане праваслаўнай парафіі ў Тапалянах.
Уручэнне высокіх адзнакаў Польскай аўтакефальнай праваслаўнай царквы, было прымеркаванае да ўрачыстасцяў з нагоды двухсотгоддзя існавання царквы ва ўрочышчы Пяценка ў гміне Міхалова. Сёння тут асвяцілі і адмысловую памятную дошку.
– Паколькі сёння юбілей храма – з моманту пабудовы споўнілася 200 год, таму айцец Аляксандр прапанаваў, каб у гонар гэтага ўручыць ордэны.
“ У памяць 200-годдзя храма ў Пяценцы” – памятная дошка з такім надпісам на царкоўнаславянскай мове была асвечана сёння і замацавана на сцяне царквы.
Якраз сёлета спаўняецца 200 гадоў з часу асьвячэння краевугольнага каменя пад будаўніцтва цяперашняй царквы, хаця гісторыя гэтага месца нашмат старэйшая, кажа даследчык праваслаўя на Падляшшы прафесар Антон Мірановіч:
– Дзе з’явілася Маці Божая дзецям, пачалася пабудова першай царквы ў гонар святой Параскевы. Пазней пабудавалі другую царкву на так званай Князёвай гары. Капліца ў гонар святых Барыса і Глеба. Гэтая святыня першая вялікая была пабудавана ў першай палове 18 стагоддзя. А тая, якую мы сёння бачым, пабудавана ў гонар Узвышэння святога Крыжа ў 1819 годзе. І сёння мы святкуем гэтую гадавіну.
На памятнай дошцы пазначаны гады 1819 – 2019 , адзначана, што дошка з’явілася намаганнямі архіепіскапа Беластоцкага і Гданьскага Якуба і настаяцеля айца Аляксандра Аляксеюка.
У гэтым годзе на рэлігійных урачыстасцях у Пяценцы прысутнічаў архіепіскап Якуб, а таксама звыш 10 святароў з суседніх прыходаў, ды некалькі сотняў вернікаў.
Царква і каплічка ля святой крыніцы ва ўрочышчы Пяценка належаць да праваслаўнай парафіі ў Тапалянах. Кожны год у 10-ю пятніцу пасля Вялікадня тут праходзяць рэлігійныя ўрачыстасці ў памяць святой Параскевы – ахоўніцы хворых, а таксама сямейства.
Валя Лаеўская, Беларускае Радыё Рацыя
