1. РАЦЫЯ
2. Сумежжа
3. Візіт Прэзідэнта Польшчы ва Украіну

Візіт Прэзідэнта Польшчы ва Украіну (абнаўляецца)

Прэзідэнт Польшчы ініцыюе супрацоўніцтва з Украінай на саміце „Ініцыятывы трох мораў” 19-20 кастрычніка ў Эстоніі. Пра гэта Анджэй Дуда заявіў падчас украінска-польскага эканамічнага форуму ў Адэсе.

– Польшча ёсць і застанецца адвакатам спраў у гэтай частцы Еўропы. Найлепшым прыкладам ёсць рэалізаваная праз нас і развіваемая намі „Ініцыятыва трох мораў”. У далейшай перспектыве таксама і Украіна будзе скарыстоўваць карысць, якая вынікае  з імпульсу развіцця, які ва ўсходняй частцы ЕЗ надае „Ініцыятыва трох мораў”. Прыкладам такога праекту з’яляецца будаўніцтва транспартнага шляху Via Carpatia.

Распачатая ў 2015 годзе  „Ініцыятыва трох мораў”- стварэнне партнёрскага блока ад Балтыйскага да Чорнага і Адрыятычнага мораў – накіравана на паглыбленне інтэграцыі Цэнтральнай і Усходняй Еўропы. Праект аб’ядноўвае 12 краін.  Асноўная ўвага накіравана на развіццё інфраструктурных праектаў.

* * * 

Без добра арганізаванай інфраструктуры немагчыма пабудаваць эфектыўнае і ўзаемавыгаднае гандлёвае супрацоўніцтва, заявіў прэзідэнт Анджэй Дуда.  

Ён разам з прэзідэнтам Украіны Уладзімірам Зяленскім удзельнічае ў адкрыцці польска-ўкраінскага бізнес-форуму ў Адэсе.

Фота і відэа: prezydent.pl

* * * 

Украіна і Польшча абмяркуюць 13 кастрычніка эканамічныя стасункі на бізнес-форуме ў Адэсе. Ён стане цэнтральнай падзеяй заключнага дня афіцыйнага візіту прэзідэнта Польшчы ва Украіну. Анджэй Дуда нагадаў: летась тавараабарот паміж дзвюма краінамі склаў 7,5 мільярдаў еўра. Сёлета дынаміка зменшылася з-за каронавірусу. 

 – Гэта было звязана з закрыццём нашых гаспадарак у сувязі з пандэміяй каронавірусу. Я перакананы, што за бліжэйшы час, як у найлепшы спосаб, вытворцы, як па польскім баку, так і па ўкраінскім, па заканчэнні пандэміі, змогуць далей наладжваць супрацу і будаўніцтва ўзаемных польска-украінскіх адносін у эканамічных дачыненнях.  

Размова  на эканамічным форуме пойдзе пра сумеснае развіццё марской інфраструктуры, у прыватнасці пра супрацоўніцтва портаў Адэсы і Гданьска

***

Прэзідэнты Украіны і Польшчы прымуць удзел 13 кастрычніка ў эканамічным формуе ў Адэсе. Размова пойдзе пра сумеснае развіццё марской інфраструктуры, у прыватнасці пра супрацоўніцтва портаў Адэсы і Гданьска. Прэзідэнт Украіны Уладзімір Зяленскі спадзяецца, што гэтая бізнес-сустрэча прынясе канкрэтныя і рэальныя практычныя дасягненні. Па яго словах, нягледзячы на ​​запаволенне двухбаковага гандлю з-за пандэміі ў першай палове года, Украіна і Польшча могуць аднавіць станоўчую дынаміку і рост папярэдніх гадоў.

– Такі аптымізм даюць польскія інвестыцыі ў эканоміку Украіны. Актыўная супраца паміж нашымі рэгіёнамі дае магчымасць стварэнне супольных праектаў. Мы з панам прэзідэнтам будзем у Адэсе на ўкраінска-польскім эканамічным форуме. Чыноўнікі, прадстаўнікі бізнесу і рэгіёнаў абедзвюх дзяржаў абмяркуюць супрацу ў галіне транспарту, энергетыкі і інфраструктур. Мы мяркуем, што гэты форум прынясе канкрэтныя, рэальныя, практычныя здабыткі.

Падчас афіцыйнага візіту Анджэя Дуды ва Украіну бакі падпісалі шэраг дакументаў, якія вызначаюць перспектывы павелічэння інвестыцый ва ўкраінскую эканоміку і аб’яднання транспартнага і транзітнага патэнцыялу.

***

Санкцыі супраць Расеі, уведзеныя за агрэсію супраць Украіны, павінны працягвацца да таго часу, пакуль не будзе адноўлена тэрытарыяльная цэласнасць Украіны. Гэта падкрэсліў прэзідэнт Польшчы Анджэй Дуда па выніках сустрэчы з прэзідэнтам Украіны Уладзімірам Зяленскім.

Па словах Анджэя Дуды, праблема Крыма вельмі важная і Польшча на міжнароднай арэне заўсёды падкрэслівае: паўвостраў быў акупаваны Расеяй.

– Мы падкрэсліваем, што Рэспубліка Польшча і Украіна паважаюць міжнароднае права і асноўныя прынцыпы міжнародных адносін, адначасова заклікаючы спыніць незаконную акупацыю Аўтаномнай Рэспублікі Крым і агрэсію на Данбасе.

Анджэй Дуда пацвердзіў зацікаўленасць Польшчы ва ўдзеле ў міжнароднай платформе дэакупацыі Крыма.

Адпаведную  ініцыятыву Уладзімір Зяленскі агучыў у канцы верасня падчас выступлення на пленарным пасяджэнні 75-й сесіі Генеральнай Асамблеі ААН

* * * 

Прэзідэнт Украіны прыняў рашэнне адкрыць новае Генеральнае консульства  ў польскім Уроцлаве. Пра гэта Уладзімір Зяленскі заявіў па выніках сённяшніх перамоў з прэзідэнтам Польшчы Анджэем Дудам. Калі канкрэтна запрацуе дыплатаматычная ўстанова, пакуль невядома: арыенцір наступны год.

– Украіна прагне забяспечыць сваім грамадзянам неабходную консульскую абарону. Таму я ўхваліў рашэнне пра адкрыццё новага Генеральнага консульства ва Уроцлаве. І разлічваю, што яно запрацуе ўжо ў наступных годзе.

Прэзідэнт Польшчы Анджэй Дуда наведвае з афіцыйным візітам  Украіну 11-13 кастрычніка. Заўтра кіраўнікі дзвюх краін зноў сустрэнуцца падчас эканамічнага форуму ў Адэсе. 

Беларускае Радыё Рацыя, Украіна

Фота: prezydent.pl

* * * 

Прэзідэнт Польшчы Анджэй Дуда ўшанаваў памяць ахвяраў Галадамору ва Украіне 1932-1933 гадоў, паставіўшы да мемарыяла сімвалічны кошык з каласамі.

Таксама Анджэй Дуда запаліў свечку перад Крыжам Герояў Нябеснай Сотні.

Як паведамлялася раней, у панядзелак, 12 кастрычніка, адбудзецца палітычная частка візіту Дуды ва Украіну. У прыватнасці, ён сустрэнецца з прэзідэнтам Украіны Уладзімірам Зяленскім, старшынём Вярхоўнай Рады Дзмітрыем Разумковым і прэм’ер-міністрам Дзянісам Шмыгалём.

Фота: скрыншот з відэа Канцылярыя Прэзідэнта Рэспублікі Польшча

* * *

Прэзідэнт Польшчы Анджэй Дуда прыбыў ва Украіну і ўшанаваў памяць забітых палякаў у Быкоўні Кіеўскай вобласці.

„Праўда і памяць павінны працягвацца. Сёння на польскіх вайсковых могілках у Быкоўні я ўшаноўваю памяць 3435 польскіх зняволеных з украінскага спісу Катыні, якія былі забітыя 80 гадоў таму савецкім НКВД і якія загінулі за свабодную і суверэнную Польшчу», – напісаў Дуда ў Twitter. Цягам 1937-1941 гадоў целы расстраляных у турмах НКВД у Кіеве былі дастаўлены ў Быкаўнянскі лес Кіеўскай вобласці для сакрэтнага пахавання ў лесе. Паводле розных ацэнак, тут пахаваны ад 20 000 да больш за 100 000 чалавек, якія падвяргаліся катаванням падчас допытаў альбо былі расстраляны пазасудова савецкай уладай.

11 кастрычніка прэзідэнцкая пара на польскіх вайсковых могілках у кіеўскім раёне Быкоўні брала ўдзел ва ўшаноўванні 80-й гадавіны з часу Катыньскай трагедыі. Па словах кіраўніка кабінета прэзідэнта Польшчы Кшыштафа Шчэрскага, афіцыйны візіт павінен быў адбыцца ў красавіку, але з-за эпідэміі візіт быў перанесены.

У Нацыянальным гісторыка-мемарыяльным комплексе «Быкаўнянскія магілы» прайшла  цырымонія ўскладання вянкоў да Міжнароднага мемарыяла ахвярам таталітарызму 1937-41 гадоў. Прэзідэнт Польшчы аддаў пашану польскім ахвярам злачынстваў НКВД, якія пахаваны ў агульнай магіле на польскіх вайсковых могілках.

Другі дзень візіту будзе прысвечаны афіцыйным перамовам на самым высокім роўні. Запланавана сустрэчы Анджэя Дуды з прэзідэнтам Украіны Уладзімірам Зяленскім, прэм’ер-міністрам Дзянісам Шмыгалем, а таксама са старшынём Вярхоўнай Рады Дзмітрыем Разумковым.

Візіт прэзідэнцкай пары Польшчы ва Украіну завершыцца ў аўторак. У Адэсе запланавана падпісанне польска-ўкраінскіх эканамічных дамоваў.

Фота і відэа: prezydent.pl

***

Прэзідэнт Польшчы Анджэй Дуда і першая лэдзі Агата Корнхаўзер-Дуда наведваюць Украіну ў нядзелю з афіцыйным візітам. Прэзідэнт Польшчы павінен сустрэцца з вышэйшым кіраўніцтвам украінскай дзяржавы – прэзідэнтам, прэм’ер-міністрам, старшынём Вярхоўнай Рады.

Візіт Дуды пачнецца з наведвання мемарыяла ў Быкоўні, недалёка ад Кіева, дзе пахаваны ахвяры сталінскіх рэпрэсій, у тым ліку палякі. Палітычная частка візіту запланавана на панядзелак, 12 кастрычніка. Анджэй Дуда сустрэнецца з прэзідэнтам Уладзімірам Зяленскім, прэм’ер-міністрам Дзянісам Шмыгалем і спікерам Вярхоўнай Рады Украіны Дзмітрыем Разумковым.

Палітычныя перамовы будуць прысвечаны двухбаковай супрацы, еўраатлантычным памкненням Украіны і рэгіянальным пытанням, у тым ліку сітуацыі ў Беларусі. Таксама вядома, што падчас візіту ў Кіеў прэзідэнт Польшчы адкрые помнік сузаснавальніцы польскага прафсаюзнага руху „Салідарнасць”, народжанай ва Украіне Анне Валентыновіч перад пасольствам Польшчы ў Кіеве. Яна нарадзілася ў 1929 годзе ў Роўне і загінула 10 красавіка 2010 года ў Смаленскай авіякатастрофе.

Візіт прэзідэнта Польшчы ва Украіну завершыцца апоўдні ў аўторак, 13 кастрычніка.

Беларускае Радыё Рацыя