“Я дома”- адукацыйная пляцоўка ў Польшчы для беларускіх дзяцей
У Польшчы паўстала некалькі беларускіх адукацыйных пляцовак для дзяцей эмігрантаў. Сярод іх – школа і садок пад назвай “Я дома”, створаныя адмыслова для беларусаў, якія пераехалі ў Польшчу. Пра тое, як працуе гэтая ўстанова, колькі там дзетак і ці ёсць канкурэнцыя з іншымі падобнымі адукацыйнымі пляцоўкамі, наша карэспандэнтка Яна Запольская пагаварыла з нашай сённяшняй госцяй Асяй Смаляк. Ася была адной з удзельніц першага Міжнароднага дня беларускай адукацыі ў Беластоку.
Ася Смаляк: Я прадстаўніца адукацыйнай установы “Я дома”. Гэта базавая і пачатковая школа, а таксама інстытут.
РР: А што значыць інстытут?
Ася Смаляк: Мы таксама маем курсы для навучання настаўнікаў па мантэсоры метаду для таго, каб вучыць дзетак ў дашкольнай сістэме, гэта з 3 да 6 гадоў па мантэсоры метаду, а таксама зараз рыхтуем ужо школьныя курсы 1-3 класы, выкладанне па мантэсоры сістэме. Каму гэта будзе цікава і для чаго гэта? Мантэсоры метад – гэта не толькі для тых, хто яго будзе цалкам выкарыстоўваць. Гэта ў першую чаргу інструмент, гэта веды і гэта матэрыял, які можна выкарыстоўваць у любой навучальнай установе. Можна выкарыстоўваць ў звычайнай школе, можна нават у беларускай сістэме, можна ў польскай, на курсах, на дадатковых занятках. Гэта проста спосаб мыслення і стаўлення да дзіцяці і гэта навуковы падыход падачы інфармацыі дзіцяці.
РР: Вы цяпер базуецеся ў Варшаве?
Ася Смаляк: Так. Мы цалкам прыватная ініцыятыва, у нас няма падтрымкі пакуль што і няма афіцыйнай акрэдытацыі. Мы зараз працуем над тым, каб яе атрымаць. І таму нашы дзеці прывязаныя не да нас, а ў польскую мантэсоры-школу на ўдалёнку. Экзамены прымае гэтая школа, а базуюцца яны ў нас. Яны прыходзяць ва ўстанову, займаюцца з раніцы да вечара з настаўнікамі, маюць урокі, а пасля паступова рыхтуюцца да экзаменаў, і ў канцы года здаюць экзамены па кожным прадмеце тры разы: на вусным, пісьмовым узроўні і як праектная дзейнасць.
РР: Намінальна яны ў польскай сістэме адукацыі?
Ася Смаляк: Так. Намінальна яны ў польскай сістэме адукацыі, бо мы знаходзімся ў Польшчы і мы мусім атрымліваць польскую сертыфікацыю. Дзеці атрымліваюць яе афіцыйна. Прытым у вельмі цудоўнай школе. Польская гданьская мантэсоры-школа адна з такіх самабытных мантэсоры-школ. Яна буйная і з’яўляецца прыкладам для еўрапейскага грамадства. Яна ўдзельнічае ў міжнародных стасунках, вельмі такая лаяльна, вельмі адэкватная ў плане стаўлення да асобы, да дзяцінства і такі прыклад гуманітарнай інстытуцыі, чалавечага стаўлення да дзяцей.
РР: У вас дзеці займаюцца штодня, 5 дзён у тыдзень, і на якой мове?
Ася Смаляк: Так, яны займаюцца пяць дзён на тыдзень. З раніцы да вечара, асабліва пачатковая школа. Яны вучацца з 9.00 да 16.30. Яны навучаюцца на трох мовах: польскай, беларускай і ангельскай. То-бок некаторыя прадметы мы спачатку падаем на беларускай мове, а пасля цалкам дублюем на польскай. Таму гэта займае даволі шмат часу, але дзеці вельмі добра засвойваюць тады прадмет. Мы не проста дублюем адну і тую ж інфармацыю, а напрыклад, яны праходзяць тэорыю на беларускай мове, а пасля рыхтуюць праект на польскай з тымі ж самымі тэрмінамі і тэмай. І атрымліваецца, што на двух мовах яны праходзяць адзін і той жа прадмет. А пасля настаўнік ангельскай мовы ўзгадвае тую ж самую тэму, але па-ангельску.
Цалкам гутарку слухайце ў далучаным файле:
Беларускае Радыё Рацыя
