“Я нарадзіўся тут”
У дзіцячым садку №1 у Гайнаўцы прайшлі супольныя беларускамоўныя заняткі мясцовых дашкольнікаў і беластоцкіх вучняў пачатковай школы №4 у Беластоку. У абедзвюх пляцоўках вядзецца навучанне беларускай мове.
Дзеткі і моладзь спявалі беларускія песні, чыталі ды размаўлялі па-беларуску. “Сустрэча – гэта чарговы пункт нашага летніка “Я нарадзіўся тут”, – паясняе настаўніца беларускай мовы з беластоцкай пачатковай школы №4 Аліна Ваўранюк:
– Паколькі летнік адбываецца ў Гайнаўцы, мы вырашылі, што добра было б сустрэцца з вучнямі, якія таксама вывучаюць беларускую мову. Але цяпер канікулы, таму мы прыйшлі ў садок. Галоўная тэма ўсяго летніка – гэта кнігі. У гэтым годзе гадавіна надрукавання першай кнігі на беларускай мове.
Галоўнае месца падзей летніка – Музей і асяродак беларускай культуры. Удзельнікі займаліся абрадавым ручніком. Шляхам сваіх літаратурных герояў правёў моладзь беларускі пісьменнік з Гайнаўкі Міхась Андрасюк. Летнікі ладзяцца з 2004 года беластоцкім Аб’яднаннем у карысць дзяцей і моладзі, якія вывучаюць беларускую мову, “АБ-БА”.
[Not a valid template]
Давід Гайко, Беларускае Радыё Рацыя, Гайнаўка
Фота аўтара
