Заява Беларускага гістарычнага таварыства і Фонда Kamunikat.org
У Менску і многіх іншых гарадах з нядзелі, 9 жніўня, працягваюцца мірныя акцыі пратэсту беларусаў супраць фальсіфікацыі вынікаў прэзідэнцкіх выбараў. Аляксандр Лукашэнка, які кіруе краінай з 1994 года, у чарговы раз абвясціў сябе пераможцам, нібыта набраўшы 80% галасоў.
Абураныя беларусы выйшлі на вуліцы, каб мірна абараніць свой голас. Каб разагнаць гэтыя акцыі пратэсту, улады накіравалі спецпадраздзяленні і армію, узброіўшы не толькі вадамётамі, гумавымі кулямі або шумавымі гранатамі, але і агнястрэльнай зброяй. У выніку гэтых падзеяў, паводле афіцыйных звестак Міністэрства ўнутраных спраў Беларусі, было затрымана больш за 5000 чалавек. Многія з іх утрымліваюцца ў нечалавечых умовах – у камеры для дзесяці чалавек утрымліваюць па 40-50 чалавек. Дзясяткі дэманстрантаў знаходзяцца ў шпіталях, сотні звярнуліся па медыцынскую дапамогу. На жаль, бываюць і смяротныя выпадкі.
Сярод затрыманых у Менску і беларускі гісторык, доктар Аляксандр Пашкевіч – рэдактар часопіса ARCHE, намеснік галоўнага рэдактара часопіса „Наша гісторыя”. Ён таксама з’яўляецца членам праграмнага савета фонду Kamunikat.org. Як рэдактар часопіса ARCHE ён шмат гадоў супрацоўнічаў з Беларускім гістарычным таварыствам.
Алеся затрымалі ў нядзелю на выбарчым участку ў Менску, дзе ён дзейнічаў як незалежны назіральнік. Паводле інфармацыі МУС Беларусі, Алеся судзяць за „хуліганства”. Кожны, хто ведае гэтага выдатнага прадстаўніка беларускай інтэлігенцыі, ведае, што ён чалавек высокай асабістай культуры, і такую сітуацыю, у якой ён „неяк абражаў бы людзей”, немагчыма ўявіць.
Мы салідарныя з беларусамі, якія незаконна затрыманы беларускімі службамі.
Мы выказваем занепакоенасць грубым парушэннем асноўных правоў чалавека ў Беларусі.
Мы патрабуем неадкладнага вызвалення Аляксандра Пашкевіча, а таксама ўсіх астатніх, затрыманых у розных гарадах Беларусі падчас мірных акцый пратэсту.
Магдалена Дэнбкоўская, старшыня Праграмнай рады Фонду Kamunikat.org
Яраслаў Іванюк, старшыня праўлення Фонду Kamunikat.org
праф. Алег Латышонак, старшыня Беларускага гістарычнага таварыства
