Жыхары Сальнічак дамагаюцца пабудовы дарогі
Жыхары раёна „Наш дом” у вёсцы Сальнічкі, што пад Беластокам, 12 гадоў дамагаюцца пабудовы дарогі і пад’яздных вуліц да іх дамоў.
„У час вясенняга разводдзя немагчыма прайсці пешшу і цяжка праехаць на машыне”, – кажуць мясцовыя жыхары.
Такая сітуацыя працягваецца ад пачатку ўзнікнення раёна, адзначае беларускі рэжысёр і жыхар Сальнічак Юры Каліна:
– Да гэтага часу даезд да хаты вясной, калі ідзе дождж альбо восенню, практычна немагчыма, калі хто мае малую машыну – гэта проста немагчыма праехаць. У выпадку нейкага няшчасця, напрыклад, пажару або калі трэба, каб хуткая дапамога даехала да кагосьці – гэта праблема.
На апошняй сесіі ўправы гміны Юхновец-Касцельны, мясцовыя дэпутаты прынялі рашэнне пра арганізацыю аўкцыёна на пабудову дарогі ў Сальнічках. Хто пабудуе дарогу стане вядома 16 сакавіка, кажа намеснік войта гміны Міраслава Ярошук:
– Будзем вызначаць выканаўцу пабудовы дарогі да раёна „Наш дом”, што дазволіць ажыццяўляць далейшыя інвестыцыі.
Галоўная дарога мае быць пабудавана яшчэ ў гэтым годзе. Аднак жыхары вёскі таксама дамагаюцца пабудовы пад’яздных вуліц. Паводле віцэ-войта Міраславы Ярошук, улады гміны думаюць і пра далейшыя інвестыцыі, аднак сродкі на пабудову паасобных вуліц будуць унесены ў бюджэт на 2016 год.
Беларускае Радыё Рацыя
