Беларускія студэнты пераймаюць досвед балонскага працэсу
Сустрэчы з польскімі ўладамі, знаёмства з мясцовай культурай, а таксама азнаямленне з досведам студэнцкага самакіравання. «Акадэмія студэнцкага лідарства» сумесна з Беларускім Домам у Варшаве прывезлі беларускую моладзь у польскую сталіцу.
Сярод мэтаў візіту – пазнаёміць студэнтаў з балонскай сыстэмай, да якой далучаецца Беларусь. Гаворыць Саша Кузьміч, мэнэджэрка праграмы «Акадэмія студэнцкага лідарства»:
— Сэнс візіту ў тым, каб даць людзям разуменне еўрапейскай мадэлі вышэйшай адукацыі. То бок Беларусь у Балонскі працэс уступіла, але Балонскі працэс у Беларусь не ўступіў і як гэта рабіць не вельмі зразумела нават выкладчыкам і чыноўнікам міністэрства. Тым больш студэнтам, якім ніхто пра гэта не кажа. І мэта такіх візітаў: даць комплекснае разуменне таго, як функцыянуе сістэма адукацыі еўрапейскай мадэлі.
Праграма візіту была насычанай, — зазначае галоўны трэнер адукацыйнай праграмы Яўген Міхасюк:
— Я нават не ведаю, ці быў у нас вольны час. Мы пазнаёміліся са студэнцкім самакіраваннем Польшчы, наведалі ўніверсітэты, былі ў міністэрстве адукацыі, у польскім Сейме і сустракаліся з рознымі экспертамі, а таксама студэнтамі, якія змяняюць свой універсітэт да лепшага, а нашы студэнты слухалі і пераймалі такі досвед.
Таксама ў рамках праграмы студэнты наведалі месцы ў Варшаве, звязаныя з беларускай гісторыяй.
Адам Завальня, Беларускае Радыё Рацыя, Варшава
