Новы ўрад не дазволіць стварыць гміну Грабаўка? (абноўлена)
Стварэнне новай гміны Грабаўка пад пытаннем. На сайце польскага Урада з’явіўся праект рапараджэння, якое адмяняе папярэдняе рашэнне Савета Міністраў у справе яе стварэння.
Гэта абгрунтоўваецца тым, што па выніках травеньскага рэферэндуму 55% жыхароў усёй гміны Супрасль былі супраць падзелу. Згодна з праектам рапараджэнне павінна ўступіць у сілу да канца года. Наступнае пасяджэнне Урада адбудзецца 8 снежня.
За адмову ад ідэі стварэння новай гміны сярод іншых змагаўся мэр Супрасля Радаслаў Дабравольскі.
Жыхары, якія змагаліся за стварэнне новай гміны папярэджваюць, што будуць пратэставаць, кажа солтыс вёскі Засцянкі Павел Каранкевіч.
— Нехта зрабіў нам такі вось «падарунак». У інтэрнэце можна ўбачыць, як гэта выглядае: нібы ёсць нейкі праект новага распараджэння, пра адмену старога распараджэння мінулага Ўрада і мы не ведаем, што цяпер будзе. Мы будзем блакаваць дарогу ў кірунку на Баброўнікі, транспартную развязку ў Грабаўцы, хто хоча, няхай прыходзіць. Усіх людзей, які неабыякавы лёс нашай гміны мы запрашаем да ўдзелу.
Пратэст жыхароў Грабаўкі і навакольных вёсак адбудзецца 4 снежня з 14 да 16 гадзін.
„Гэта наносіць удар па асновах дэмакратыі. У нашых вёсках за новую гміну было амаль 79% насельніцтва. Цяпер ніхто не пытаў нас пра меркаванне”, – кажа Пётр Тадарчук, адзін з ініцыятараў стварэння новай гміны.
Падрыхтоўка да стварэння новай гміны ішла некалькі месяцаў. За яе стварэнне жыхары змагаліся на працягу некалькіх гадоў. У яе склад павінны былі ўвайсці вёскі Засцянкі, Грабоўка, Генрыкава, Собалева і Саўляны. На наступным тыдні павінна была адбыцца кансультатыўная сустрэча па гэтым пытанні, аднак, з-за праекта распараджэнне было адменена.
Беларускае Радыё Рацыя
