Пілігрымка ў Друю да 100-годдзя біскупа Чэслава Сіповіча
Да 100-годдзя біскупа Чэслава Сіповіча беларускія каталікі ўсходняга абраду ладзяць пілігрымку ў Друю, што на Віцебшчыне. Чэслаў Сіповіч быў першым беларускім грэка-каталіцкім біскупам у ХХ стагоддзі.
Пра акалічнасці пілігрымкі кажа святар Андрэй Крот:
– Гэта даволі значная дата, калі глядзець на нашую культуру не толькі ў рэлігійную, але і ўвогуле ў беларускую культуру. Таму ў гэтыя выходныя 31-га жніўня ў Друі, у тым месцы, дзе ён пачынаў свой духоўны шлях, будзе адслужана ўрачыстая літургія. У ёй прыме ўдзел Апостальскі нунцый у Рэспубліцы Беларусь уладыка Клаўдзій Гуджэроцці, біскуп Віцебскі Алег Буткевіч, таксама Апостальскі візітатар для грэка-каталікоў Беларусі Сяргей Гаек.
Біскуп Чэслаў Сіповіч вядомы, як стваральнік беларускага пасляваеннага асяродка ў Лондане. Менавіта ён арганізаваў вядомую бібліятэку імя Францішка Скарыны.
31-га жніўня аўтобус з пілігрымамі з Менска накіруеца ў Друю, дзе і пройдуць урачыстасці.
Якуб Сушчынскі, Беларускае Радыё Рацыя, Гародня
