Працягваецца пераслед удзельнікаў Свіслацкага фэсту
Афіцыйныя беларускія ўлады працягваюць пераслед у дачыненні да ўдзельнікаў акцыі памяці паўстанцаў Каліноўскага што адбылася трыма тыднямі раней.
Берасцейцы тут не выключэнне і пасля Гародні “першыя званочкі” міліцыі пачалі даходзіць ужо сюды. Аднак нягледзячы на мажлівыя пратаколы і суды, жыхары рэгіёна не губляюць аптымізму і маюць намер працягваць ушаноўваць паўстанцаў у Свіслачы.
Кажа Аляксанд Мех з Кобрыні:
– Мы ж добра разумеем, што гэта антыбеларуская ўлада, а я хачу жыць у сваёй Беларусі, дзе будзе беларуская ўлада.
Яўген Скрабутан:
– Пра сваіх герояў не трэба забываць, пра іх трэба памятаць. Гэты штогадовы фэст у Свіслачы добры прыклад таго, што беларусы не забыліся пра паўстанцаў і з’язджаюцца кожны год, каб ушанаваць іх памяць.
Стала вядома, што да бацькоў Яўгена Скрабутана, якія жывуць у Зэльве на Гарадзеншчыне, прыходзілі з міліцыі. Па-словах маладога чалавека, шукалі яго праз ягоны магчымы ўдзел у фэсце памяці паўстанцаў “Свіслач 2016”.
Сам жа Яўген, пакуль ніякіх афіцыйных папераў не атрымаў. Падчас акцыі спецслужбоўцы ў цывільным актыўна здымалі ўдзельнікаў на відэакамеры.
Беларускае Радыё Рацыя
