Авіякампанія Finnair з чэрвеня запускае прамы рэйс Хельсінкі – Менск
Нацыянальны аэрапорт Менск і авіякампанія Finnair адкрываюць круглагадовы прамы рэйс Хельсінкі — Менск. Ён стартуе 9 чэрвеня 2018 года і будзе выконвацца двойчы на тыдзень па аўторках і суботах.
Як вынікае з паведамлення на сайце аэрапорта, новы напрамак Finnair будзе абслугоўвацца 100-мясцовымі самалётамі Embraer-190 у двухкласнай кампаноўцы, „так што пасажыры, якія імкнуцца падарожнічаць з павышаным камфортам, змогуць ацаніць усе перавагі сэрвісу бізнес-класа авіякампаніі”.
Рэйсы з Хельсінкі будуць адпраўляцца ў 09.45 з прыбыццём у нацыянальны аэрапорт Менск у 11.00, зваротны рэйс — у 11.45 з прыбыццём у 13.00 у аэрапорт Хельсінкі-Вантаа. Агульны час у шляху складзе 1 гадзіну 15 хвілін. Як адзначаюць у аэрапорце, расклад складзены максімальна зручна не толькі для тых пасажыраў, хто вырашыў наведаць Хельсінкі, але перш за ўсё для тых, хто падарожнічае з Finnair далей у Еўропу, Азію ці Амерыку.
„Прамы рэйс у Менск адкрывае перад жыхарамі Беларусі шырокія магчымасці для падарожжаў па ўсім свеце, — адзначыў камерцыйны дырэктар Finnair Юха Ярвінен. — Ён злучае сталіцу Беларусі праз аэрапорт Хельсінкі-Вантаа са 100 з лішнім гарадамі Еўропы, Паўночнай Амерыкі і Азіяцка-Ціхаакіянскага рэгіёна, што будзе спрыяць росту як ўязнога, так і выязнога турызму ў краіне”.
Кампанія Finnair з’яўляецца адзіным перавозчыкам Скандынавіі, які атрымаў чатыры зоркі ў рэйтынгу найлепшых авіякампаній свету Skytrax. Finnair таксама восем разоў запар была прызнаная найлепшай авіякампаніяй Паўночнай Еўропы на цырымоніі World Airline Awards.
belapan.by
