Беларусь дапамагла вярнуцца ў краіну 8000 грамадзянам
Пачынаючы з сярэдзіны сакавіка, пасля ўвядзення шэрагам краін надзвычайных абмежавальных мер у сувязі з пандэміяй COVID-19, разнапланавае садзейнічанне ў вяртанні ў Беларусь аказана каля 8.000 грамадзян краіны. Пры гэтым толькі за апошні тыдзень на радзіму змаглі вярнуцца каля 300 суайчыннікаў, паведаміла 15 траўня Міністэрства замежных спраў.
„Знятая вострая сітуацыя з вывазам беларусаў з краін з асабліва напружаным эвакуацыйным становішчам — гэта Індыя, ААЭ і Егіпет, куды за мінулыя тры тыдні ў каардынацыі з нацыянальнай авіякампаніяй „Белавія” арганізаваныя тры спецыяльныя рэйсы. У агульнай складанасці гэтымі авіярэйсамі ў Беларусь дастаўленыя 462 чалавекі, больш за палову з якіх склалі грамадзяне нашай краіны. На працягу мінулага тыдня некалькі нашых грамадзян дадаткова вылецелі з Індыі эвакуацыйнымі рэйсамі ўкраінскага боку. Пры садзейнічанні пасольства ў Кіеве яны былі пасля дастаўленыя ў Беларусь”, — адзначае МЗС.
Магчымасцю вылецець беларускімі спецрэйсамі скарысталіся жыхары яшчэ шаснаццаці дзяржаў, у тым ліку Расеі (самая шматлікая група — 120 чалавек), Украіны, Казахстана, Азербайджана, Арменіі, Аўстрыі, Латвіі, Швецыі і іншых.
Пры непасрэднай дапамозе замежных устаноў дзясяткі беларускіх грамадзян пакінулі асобныя краіны Афрыкі і Іарданію.
У цесным узаемадзеянні з расійскім бокам на спецыяльных вывазных рэйсах грамадзяне Беларусі змаглі вярнуцца з Кітая, Венесуэлы і Сейшэльскіх астравоў.
„Па-ранейшаму захоўваецца напружанае становішча з выездам з В’етнама і Тайланда. У сувязі з малалікасцю жадаючых скарыстацца магчымасцю вылету спецыяльнымі рэйсамі беларускія дыппрадстаўніцтвы ў рэгіёне працягнуць прапрацоўваць альтэрнатыўныя маршруты для вяртання грамадзян дадому”, — канстатуе МЗС.
Адначасова ведамства адзначае наяўнасць рэгулярных авіязносін В’етнама з Нідэрландамі і Фінляндыяй, адкуль ёсць магчымасць транзіту ў Беларусь.
МЗС таксама звяртае ўвагу, што шэрагам краін прынятыя і паэтапна ўводзяцца планы па змякчэнні каранцінных мер. Разам з тым гэтыя паслабленні пакуль неістотна адбіваюцца на свабодзе перамяшчэння: здымаюцца абмежаванні на працу асобных відаў прадпрыемстваў і ўстаноў.
