Эпір. Мора, лаўры і макі
Правінцыя Эпір, што на паўночным захадзе Грэцыі, не такая папулярная ў турыстаў, як Атыка, Крыт ці Іянічныя выспы. Гэта патрыярхальны край, населены нетаропкімі сялянамі, разважлівымі гандлярамі і пабожнымі старэчамі.
Марскія краявіды Эпіра мала чым адрозніваюцца ад пелапанэскіх ці крыцкіх: усё тыя ж аквамарын хваляў, жаўцізна пляжаў і беласць надзьмутых ветразяў. А вось узбярэжжа адметнае неверагоднай колькасцю макаў і, асабліва – непраходнымі лаўровымі зарасцямі.
Шпацыруючы тымі гаямі, між волі ловіш сябе на думцы: а можа, тыя дрэвы – нашчадкі тых самых лаўраў, вяночкамі з якіх узнагароджвалі алімпіёнікаў антычнасці, пераможных стратэгаў і вялікіх паэтаў?
Марцін Война, Беларускае Радыё Рацыя
Фота аўтара
