Ісландыя адмяніла ўсе ўведзеныя з-за кавіду абмежаванні
Улады Ісландыі з 26 чэрвеня адмянілі ўсе абмежаванні, уведзеныя ў краіне з-за каронавіруса, паведамляе meduza са спасылкай на Reuters.
Адмовіцца ад абмежавальных мер стала магчыма дзякуючы таму, што 87% жыхароў краіны, старэйшыя за 16 гадоў, атрымалі як мінімум першую дозу вакцыны, а 48% — прайшлі поўны курс вакцынацыі.
Ісландыя, верагодна, першая краіна ў Еўропе, якая адмяняе ўсе антыкавідныя меры.
Да апошняга часу ў Ісландыі дзейнічалі абмежаванні на масавыя мерапрыемствы і правілы аб неабходнасці захавання двухметровай дыстанцыі.
У Ісландыі жывуць каля 360 тысяч чалавек. З пачатку пандэміі ў краіне зафіксавана 6637 выпадкаў COVID-19, памерлі 30 чалавек.
