Хельсінкі сыходзіць на каранцін з-за каронавіруса
Сталічная правінцыя Уусімаа, у якой пражывае 1.7 млн чалавек, ізаляваная ад астатняй Фінляндыі сіламі паліцыі. Урад краіны прыняў такое рашэнне ў сувязі з тым, што на Хельсінкі і наваколле прыходзіцца 75 адсоткаў пацверджаных выпадкаў заражэння каронавірусам. Абмежаванні ўводзяцца як мінімум да 19 красавіка.
Перакрытыя дарогі, узяты пад кантроль аўтобусная і чыгуначныя зносіны. Уводзіцца забарона на ўезд і выезд, акрамя выпадкаў, звязаных з выкананнем тэрміновых службовых абавязкаў. Штрафамі пагражаюць толькі ў выпадку некалькіх парушэнняў. Аднак, у межах Уусімаа жыхары могуць перасоўвацца без абмежаванняў. Але і ім ўлады раяць сядзець дома.
Па абноўленым прагнозе Інстытута аховы здароўя і сацыяльнага развіцця THL, колькасць шпіталізаваных на піку эпідэміі складзе 900 чалавек адначасова, з іх 200 апынуцца ў рэанімацыі. Гэта роўна ў 10 разоў больш, чым цяпер. А ўсяго ў бальніцы з дыягназам CoVID-19 падчас эпідэміі пабывае 11300 чалавек, а ў інтэнсіўнай тэрапіі – 3600. Пік захворвання чакаецца не раней сярэдзіны траўня.
Тэрміны эпідэміі для мясцовых вірусолагаў застаюцца загадкай. Па самых аптымістычных прагнозах, шаленства каронавіруса на фінскай зямлі працягнецца да сярэдзіны лета.
