Колькасць турыстаў з Еўразвязу вырасла амаль у 2 разы
Колькасць арганізаваных турыстаў і экскурсантаў з краін Еўрапейскага звязу ў 2018 годзе ў Беларусі вырасла амаль у 2 разы. Гэта вынікае з статыстычнай інфармацыі, размешчанай у бюлетэні Белстата аб развіцці турызму ў 2018 годзе.
Так, калі ў 2017 годзе з краін ЕЗ у Беларусь у якасці турыстаў і экскурсантаў прыехалі 70 089 чалавек, то ў 2018 годзе іх было ужо 135 059.
Статыстыка ўлічвае тых, хто адправіўся ў Беларусь па пуцёўках, набытых у туркампаній. Турыстам лічыцца чалавек, чыё падарожжа доўжыцца ад 24 гадзін да аднаго года, або той, хто робіць не менш за адну начоўку. Экскурсанты здзяйсняюць экскурсіі без начовак.
Больш за ўсё людзей па арганізаваных турах прыехала з Літвы – амаль 60 тыс. (рост у 2,3 разы ў параўнанні з 2017 годам) і Польшчы – 46,3 тыс. (рост у 2 разы). Тройку замыкае Латвія, турпаток адкуль вырас у 1,7 разы да 11 тыс. чалавек. У топ-5 таксама Германія і Іспанія. Калі з Германіі прыехала арганізаваных турыстаў і экскурсантаў на 15% больш, то з Іспаніі – у 2,3 разы больш, чым у 2017 годзе.
Колькасць прыбыўшых з краін СНД вырасла на 7,3% да 213 431 турыста і экскурсанта. Пры гэтым больш за ўсё прыехала з Расеі – 207 416 (рост на 8,3%).
З іншых краін у Беларусі падарожнічалі 17 044 турысты і экскурсанты (плюс 23,2% да 2017 года). На 28% вырас паток з ЗША і Ізраіля (да 1 723 і 2 069 чалавек адпаведна), на 40% – з Турцыі (1 613). Кітай паказаў рост на 4% (у Беларусь прыехалі 3 277 чалавек). Прыкметна вырасла колькасць арганізаваных турыстаў і экскурсантаў з Аб’яднаных Арабскіх Эміратаў – 1 034 чалавекі у 2018 годзе супраць 28 у 2017-м.
У цэлым колькасць арганізаваных турыстаў і экскурсантаў, якія наведалі Беларусь у 2018 годзе, склала 365 534 чалавека (у 2017-м – 282 694).
Па бязвізавым рэжыме больш за ўсё арганізаваных турыстаў і экскурсантаў прыехалі з Літвы, Польшчы, Латвіі, Германіі, Эстоніі і Вялікабрытаніі.
Фота onliner.by
