Тбілісі: раён лазняў увечары
У сталіцы Грузіі (Сакартвела) існуе легенда пра тое, выраз «ідзі ў лазню» з’явіўся менавіта тут. Калі казаць канкрэтна і тэрытарыяльна – ён з’явіўся ў самым цэнтры Старога горада, раёне Абанатубані (у перакладзе з грузінскага «раён лазняў»).
Шмат хто, калі гуляе па цэнтру старога горада, бачыць крытыя цагляныя купалы з адтулінамі. Гэтыя цагляныя купалы пабудаваныя ў XVII-XVIII стст. І гэта зусім не мячэці – гэта лазні.
Сумневы развеюцца імгненна: вы адчуеце ў паветры павеў рэзкага паху серы. Але, паверце, вы да яго прызвычаіцеся. Самабытнасць навакольнай тэрыторыі зачаруе вас настолькі, што нават гэты пах здасца прыемным акампанементам да мелодыі тбіліскага каларыту.
Тбіліскія лазні – гэта эпоха, а грузінскія «цёршчыкі» (па-грузінску «мекісе») – гэта тыя, хто тварыў гісторыю лазневай эпохі.
І працягваюць тварыць, бо валоданне дадзеным мастацтвам у большасці выпадкаў перадаецца з пакалення ў пакаленне. І кожны «цёршчык» мае свае сакрэты, метады лячэння і дастаўленні задавальнення кліентам. І калі раптам ён узлятае на вашы плечы, упраўляе косткі, не прычыняючы вам пры гэтым болі, не палохайцеся, а атрымлівайце асалоду і заўважце: вы ў руках сапраўднага майстра!
Наведванне лазні – адна з самых любімых забаў турыстаў. Нядзіўна, бо гэта значная частка іх традыцыйнай культуры.
У раёне лазняў кіруюць азербайджанцы, таму частка будынкаў мае арабскі каларыт і наведвальнікі самых элітных лазняў здзівяцца азербайджанскай гасціннасці. Самая танная з лазняў гэта дзяржаўная лазня №5, тут кошт самы дэмакратычны – за дзве гадзіны наведвання 10 лараў (крыху менш за 4 даляры). Але і ў гэтай лазні вам прапануюць масаж і парылку і купелі з гарачай сернай вадой.
Лазні працуюць з самай раніцы да позняга вечара і ўжо адной з традыцый наведвання Тбілісі стала наведванне лазняў у старой частцы горада. Аднак, каб наведваць лазні ў Тбілісі, трэба запытацца ў вашых лекараў, ці не будуць серныя лазні мець супрацьпаказанняў для вашага здароўя! Сам я наведваў гэтыя лазні ўжо тройчы, і калі буду ў Тбілісі наступным разам, таксама планую іх наведаць.
Беларускае Радыё Рацыя, Тбілісі
