Турыстычны паток у Беларусь за год вырас на 27%
За шэсць месяцаў 2017 года паток турыстаў у Беларусь вырас на 27% у параўнанні з аналагічным перыядам 2016 года, паведаміў журналістам 25 верасня ў Менску намеснік міністра спорту і турызму Міхаіл Партной.
Паводле яго слоў, гэта перавысіла чаканні міністэрства, паколькі планавалася, што дзякуючы пяці бязвізавым дням турыстычны паток вырасце на 15-20%. З моманту ўваходжання ў сілу бязвізавага рэжыму для грамадзян 80 дзяржаў у лютым 2017 года праз нацыянальны аэрапорт Менск у Беларусь уехалі 52 тыс. чалавек, адзначыў Партной.
Даходы ад турыстычнай дзейнасці сёлета выраслі на 120% у параўнанні з мінулым годам, паведаміў намеснік міністра.
„У 2016 годзе наш план быў зарабіць 154 млн долараў у сферы турызму, а мы зарабілі 158 млн долараў. Са студзеня па чэрвень 2017 года мы ўжо зарабілі 82,6 млн долараў”, — расказаў Партной.
Між тым, адзначыў ён, міністэрству ужо мала існуючых пяці бязвізавых дзён для турыстаў. Цяпер МЗС вядзе працу над усталяваннем бязвізавага рэжыму на 10 дзён.
„Нам неабходныя гэтыя дні, асабліва гэта важна для медыцынскага турызму, — сказаў намеснік міністра. — Праца складаная, ідзе павольна, таму што гаворка аб нацыянальнай бяспецы. Да канца гэтага года мы спадзяемся закрыць тэарэтычныя пытанні ў гэтай сферы”.
Гаворачы аб лагістыцы турпатоку, Партной адзначыў, што гэта пытанне таксама прапрацоўваецца. „Мы пратэставалі спрошчаны рэжым уезду замежнікаў у нашу краіну падчас чэмпіянату свету па хакеі ў 2014 годзе, і напярэдадні II Еўрапейскіх гульняў 2019 года ў Менску і чэмпіянату свету па хакеі ў 2021 годзе яшчэ раз прапрацуем пункты ўезду. Рухаемся даволі паспяхова, але асцярожна”, — сказаў ён.
„Што тычыцца падрыхтоўкі турыстычнай сферы да прыёму ўдзельнікаў гэтых спартыўных спаборніцтваў, для прапрацоўкі пытання ў Міністэрстве спорту і турызму спецыяльна створаны падкамітэт па прыцягненні замежных турыстаў, — адзначыў чыноўнік. — Будзе аб’яўлены адкрыты конкурс на генеральнага тураператара, які атрымае поўную падтрымку дзяржавы. Далей гэты аператар пад кожную мэтавую аўдыторыю будзе распрацоўваць маршруты, лагістыку, зоймецца пытаннямі харчавання, размяшчэння, сувеніраў і гэтак далей”.
belapan.by
