У Расеі прапануюць здымаць каранцінныя абмежаванні за тры этапы
Здымаць уведзеныя ў Расеі з-за каронавіруса абмежаванні прапануецца за тры этапы. Пра гэта гаворыцца ва ўрадавым плане па зняцці каранцінных абмежаванняў, які сёння, 6 траўня, на нарадзе ў прэзідэнта Расеі Уладзіміра Пуціна прадставіла кіраўнік Расспажыўнагляду Ганна Папова.
У плане не названы канкрэтныя даты рэалізацыі этапаў, паколькі рашэнне па іх павінны прымаць кіраўнікі рэгіёнаў. «Сітуацыя ў Расеі ўнікальная, у некаторых рэгіёнах прырост хворых не перасягае 3 працэнты за суткі», – канстатавала Ганна Папова. Яна паведаміла, што Расспажыўнагляд распрацаваў для кіраўнікоў рэгіёнаў метадычныя рэкамендацыі па вызначэнні паказчыкаў, якія з’яўляюцца падставай для зняцця абмежавальных мер. Сярод гэтых паказчыкаў – тэмп прыросту захваральнасці на COVID-19, колькасць свабоднага ложкавага фонду ва ўстановах аховы здароўя, ахоп тэставаннем на каронавірус.
Паводле слоў Ганны Паповай, кожны этап прадугледжвае пашырэнне пераліку грамадскіх месцаў, якія будуць адкрывацца для грамадзян. На першым этапе плануецца дазволіць адзіночныя заняткі спортам і фізкультурай на свежым паветры, работу гандлёвых прадпрыемстваў і сферы паслуг на абмежаванай плошчы і пры ўмове забеспячэння абмежаванай колькасці людзей, якія будуць абслугоўвацца. Другі этап, у прыватнасці, прадугледжвае дазвол на сямейныя прагулкі, павелічэнне працуючых гандлёвых плошчаў прадпрыемстваў, адкрыццё адукацыйных устаноў. На трэцім этапе прапануецца дазволіць работу зон адпачынку (паркаў і сквераў), прадпрыемстваў грамадскага харчавання, поўнасцю аднавіць дзейнасць адукацыйных устаноў. Пры гэтым кіраўнік Расспажыўнагляду падкрэсліла: абмежавальныя мерапрыемствы могуць быць адноўлены пры пагаршэнні эпідэміялагічнай сітуацыі ў рэгіёнах.
У Расеі, паводле дадзеных на раніцу 6 траўня, агульная колькасць інфікаваных COVID-19 дасягнула 165929, павялічыўшыся за апошнія суткі на 10559. Самы вялікі прырост у Маскве – на 5858, агульная колькасць устаноўленых дыягназаў у расейскай сталіцы – 85973. Колькасць ахвяр віруса ў Расеі дасягнула 1537, паправіліся і выпісаны пасля перанесенага захворвання 21327 чалавек.
Фота ТАСС
Глядзіце таксама
