У Расеі забаранілі размяшчаць хостэлы ў жылых дамах
Прэзідэнт Расеі Уладзімір Пуцін падпісаў законапраект, які ўводзіць забарону на размяшчэнне гасцініц і хостэлаў у жылых дамах, піша lenta.ru.
Закон уступіць у сілу з 1 кастрычніка 2019 года.
Аўтарамі дакумента выступілі больш за 30 дэпутатаў на чале са старшынёй думскага камітэта па жыллёвай палітыцы Галінай Хаванскай. Яны прапанавалі ўнесці адпаведныя папраўкі ў Жыллёвы кодэкс. У іх паказваецца, у прыватнасці, што жылое памяшканне ў шматкватэрным доме не можа выкарыстоўвацца для прадастаўлення гасцінічных паслуг або паслуг па часовым размяшчэнні старонніх асоб
У тлумачальных матэрыялах да законапраекта дэпутаты адзначылі, што ў цэлым ўласнікі жылля маюць права распараджацца нерухомай маёмасцю па сваім меркаванні, але толькі ў тым выпадку, калі іх дзеянні не парушаюць інтарэсы іншых асоб. Размяшчэнне хостэлаў у жылых дамах, на думку аўтараў заканадаўчай ініцыятывы, гэтаму патрабаванню не адказвае: у шматкватэрных будынках міні-гасцініцы суседнічаюць са звычайнымі кватэрамі.
