Вандроўкі па мясцінах, звязаных з Першай Сусветнай вайной
Першая Сусветная вайна (1914-1918) – сёлета цэнтральная тэма для вандровак па пінскім Палессі. У сувязі са 100-годдзем уваходу нямецкіх войскаў у Пінск і акупацыі заходняга беларускага Палесся, для турыстаў падрыхтаваныя тэматычныя экскурсіі і мерапрыемствы.
У прыватнасці, турыстам распавядуць аб знаходжанні на Піншчыне ў час вайны вядомага беларускага пісьменніка Максіма Гарэцкага ды расейскага паэта Аляксандра Блока.
“Акупацыя прынесла шмат бяды, але дзякуючы кайзераўскім жаўнерам, мы маем вялікую калекцыю фотакартак старога Пінску”, – адзначыла супрацоўніца Музею Беларускага Палесся Кацярына Севярын:
– Вельмі цікавыя калекцыі паштовак, якія немцы рабілі ў час Першай Сусветнай вайны, відаць у іх была добрая оптыка. Яны пакінулі цэлы пласт вельмі цікавых фотаздымкаў не толькі горада, але і наваколляў з жыхарамі.
Акупацыя Піншчыны нямецкімі войскамі працягвалася да лістапада 1918 года, таму экскурсаводы і краязнаўцы спадзяюцца, што бліжэйшыя тры гады для турыстаў тэма Першай Сусветнай вайны (1914-1918) будзе цікавай.
Пятро Савіч, Беларускае Радыё Рацыя
Фота pinsk-history.ru
Глядзіце таксама
