Шаша з Вільні ў Аўгустаў павінна быць рэканструявана да 2028 года. Скандал у Белым доме і яго наступствы. Саміт па Украіне ў Лондане: на світанку новага альянсу? Падрабязнасці свежых матэрыялаў замежнай прэсы.
“Плануецца рэканструяваць дарогу з Вільні ў бок Аўгустова (Польшча), якая праходзіць праз так званы Сувалкскі калідор, і адаптаваць яе для патрэб ваеннай мабільнасці да сярэдзіны 2028 года”, – пішаLRT.
«У рамках стварэння альтэрнатыўнага маршруту праз Сувалкскі калідор запланавана рэканструкцыя 113-кіламетровага ўчастка шашы, які злучае Вільню, Алітус, Лаздзее і Аўгустоў, а таксама 8 мастоў. Гэты калідор з’яўляецца альтэрнатыўным маршрутам для злучэння з Заходняй Еўропай праз Польшчу, калі ў крытычнай сітуацыі калідор Via Baltica апынецца заблакаваны ці будзе выкарыстаны для іншых мэт. Міністр транспарта Літвы Эўгеніюс Сабуціс і міністр інфраструктуры Польшчы Дар’юш Клімчак у студзені дамовіліся ў Варшаве ў бліжэйшы час падаць сумесную заяўку ў Еўрапейскую камісію (ЕК) на фінансаванне адаптацыі гэтай дарогі для ваеннай мабільнасці. Сам Сувалкскі калідор праходзіць праз наваколлі Сувалкаў, Аўгустова і Сейны ў Польшчы. Ён злучае краіны Балтыі з Польшчай і іншымі дзяржавамі НАТА, а таксама падзяляе Калінінградскую вобласць Расеі і Беларусь. Выданне Politico раней называла Сувалкскі калідор “самым небяспечным месцам у свеце”, – нагадвае літоўскае выданне.
У пятніцу падчас сустрэчы ў Белым доме, якая транслявалася ў прамым эфіры тэлебачання, прэзідэнт ЗША Трамп і прэзідэнт Украіны Зяленскі ўступілі ў гарачую сварку наконт расейскай вайны супраць Украіны. Трамп і яго намеснік Вэнс запатрабавалі ад Зяленскага праявіць большую гатовасць да кампрамісаў для заключэння здзелкі, а таксама большай падзякі за падтрымку з боку Злучаных Штатаў. Зяленскі падкрэсліваў, што Расея парушае пагадненні і дамоўленасці. У наяўнасці пераломны момант, – падсумоўваюць аглядальнікі. Варшаўскі партал wPolityce.pl крытыкуе паводзіны Зяленскага.
«Ён заняў пазіцыю патрабавальнага гульца, магчыма, для таго каб паўстаць у вачах усяго свету гераічным лідарам, здольным супрацьстаяць Трампу. І ён нават не заўважыў, што хапіў цераз край. Ён абразіў не толькі бок, які прымае, але ўсіх тых, хто аказвае ўкраінцам самаадданую дапамогу. Адно толькі выказванне “Украіна – самотная” кажа ўсё аб падыходзе Зяленскага. Сарваць перамовы ў такой атмасферы – акт вялікай няспеласці. Няўжо гэтага жадаюць украінцы?”, – задаецца рытарычным пытаннем польскае выданне.
У мінулую нядзелю ў Лондане прайшоў саміт з удзелам кіраўнікоў дзяржаў і ўрадаў краін Еўропы, а таксама прэм’ер-міністра Канады Джасціна Трудо. Удзельнікі сабраліся разам, каб выказаць сваю прыхільнасць падтрымцы Украіны. Узначаленая Лонданам і Парыжам кааліцыя краін, гатовых аказваць падтрымку Украіне, мае намер нарасціць пастаўкі зброі Кіеву. Акрамя таго, краіны збіраюцца распрацаваць план па дасягненні перамір’я. «Спатрэбіцца яшчэ нейкі час, перш чым Еўропа ў ваенных адносінах зможа ўпэўнена стаяць на нагах,» – адзначае пражская Hospodářské noviny.
«Пасля скандалу падчас сустрэчы ў Белым доме паміж прэзідэнтам Украіны Уладзімірам Зяленскім і Дональдам Трампам у мінулую пятніцу Еўропа зараз шукае магчымасць абараніць Украіну – і памірыць двух прэзідэнтаў. Сітуацыя і на самой справе такая, што ў сілу ваеннай слабасці Еўропы ніякія гарантыі, якія даў бы Украіне Захад для таго, каб украінцы маглі дамовіцца з расейцамі пра спыненне агню на прымальных для сябе ўмовах, без Амерыкі не працавалі б па меншай меры бліжэйшыя некалькі гадоў. У той жа самы час Еўропа яшчэ доўга не будзе ў стане сама абараняць сябе – з прычыны залежнасці ад амерыканскіх тэхналогій, лагістыкі і спецслужбаў», – піша чэшскае выданне.
Лідар Працоўнай партыі Курдыстана Абдула Оджалан, які з 1999 года знаходзіцца ў турэмным зняволенні, заклікаў сваіх прыхільнікаў распусціць падпольную РПК, адным з заснавальнікаў якой ён быў, – і скласці зброю. У многіх краінах гэтая арганізацыя лічыцца тэрарыстычнай. Судзячы па ўсім, ключавую ролю ў закліку скласці зброю згулялі дэпутаты пракурдскай Народнай партыі роўнасці і дэмакратыі, неаднаразова наведвалі Оджалана ў турме. Якія шанцы на тое, што канфлікт, які доўжыцца ўжо дзесяцігоддзі, будзе завершаны? Радыёстанцыя France Inter разважае пра тое, што тое, што адбываецца, азначае для Сірыі.
«Сітуацыя вельмі складаная: Турцыя, якая ўзмацніла свой уплыў у Дамаску, пагражае пачаць ваенную інтэрвенцыю супраць узброеных сірыйскіх курдаў у рамках сваёй барацьбы супраць РПК. Але тыя з часу іх удзелу ў вайне супраць ІДІЛ знаходзяцца пад абаронай амерыканцаў. Да якіх наступстваў для Сірыі прывядзе магчымая разрадка сітуацыі ў Турцыі? Гэта будзе залежаць ад дынамікі паміж Абдулай Оджаланам, прэзідэнтам Турцыі Рэджэпам Тайіпам Эрдаганам і кіраўніком Сірыі Ахмедам аш-Шаара. Ёсць слабая надзея на тое, што ў гэтым – і так ужо шматпакутным – рэгіёне запануе мір», – падкрэслівае France Inter.
Агляд сусветнай прэсы падрыхтавала Вольга Сямашка
