У Міністэрстве абароны Беларусі паведамілі аб нарошчванні праверкі баявой гатоўнасці злучэнняў і вайсковых частак Узброеных сіл краіны.
Як адзначаецца ў паведамленні прэсавай службы Мінабароны, у межах праверкі баявой гатоўнасці пачаліся камандна-штабныя вучэнні з 336-й рэактыўнай артылерыйскай брыгадай. У складзе гэтай брыгады яшчэ ў 2016 годзе сфарміравалі дывізіён рэактыўных сістэм залпавага агню “Паланэз”.
“Вайскоўцы брыгады выканаюць комплекс мерапрыемстваў па падрыхтоўцы тэхнікі да прымянення, выхаду ў прызначаныя раёны і выкананні навучальна-баявых задач. Таксама разлікі баявых машын будуць удасканальваць практычныя навыкі на штатным узбраенні”, — адзначаецца ў афіцыйным паведамленні. На тэрыторыі Беларусі ўвесь час ад моманту расейскага ўварвання ва Ўкраіну амаль бесперапынна праводзяцца вайсковыя вучэнні.
