Міністэрства антыманапольнага рэгулявання і гандлю (МАРГ) падпісала пагадненні з мабільнымі аператарамі А1 і МТС аб непавышэнні тарыфаў на паслугі мабільнай сувязі ў 2026 годзе. Пра гэта паведамілі ў прэс-службе ведамства.
Папярэдняе аналагічнае пагадненне МАРГ падаўжала ў кастрычніку. Тады аператары бралі на сябе абавязацельства не павышаць тарыфы да канца 2025 года.
У чэрвені МТС і А1 папярэдзілі абанентаў пра закрыццё некаторых папулярных архіўных тарыфных планаў, аднак пазней адмовіліся ад гэтага намеру. Як паведамілі пасля ў МАРГ, з гэтай нагоды адбылася сустрэча з удзелам прадстаўнікоў Міністэрства сувязі, а таксама кампаній МТС і А1.
Нагадаем, з 1 красавіка 2025 года аператары мабільнай сувязі запусцілі базавыя сацыяльныя тарыфы.
