У цэлым інфляцыя ў Беларусі ў кастрычніку запаволілася і склала у гадавым выражэнні 5,9%, пасля 6% у верасні, паведамілі спецыялісты Еўразійскага банка развіцця ў чарговым аглядзе.
Асноўным фактарам росту коштаў стала падаражэнне нерэгулюемых паслуг, бо інфляцыя ў гэтым сектары павысілася да 6% у кастрычніку пасля 5,6% у верасні. Эксперты дадалі, што паслугі падаражэлі з-за істотнага павелічэння выдаткаў на аплату працы і высокага ўзроўню спажывецкага попыту.
У банку таксама адзначылі, што працягваецца паскарэнне базавай інфляцыі, якая дасягнула 5,3% у кастрычніку пасля 5,1% у верасні і 4,8% у жніўні.
У таварным сегменце інфляцыя заставалася ўмеранай, дзякуючы ўздзеянню мер цэнавага рэгулявання. Інфляцыя харчовага кошыка склала 7,2% у кастрычніку пасля 7,5% у верасні — ключавым фактарам стала зніжэнне коштаў на гародніну.
Еўразійскі банк развіцця прагназуе, што рост цэн у Беларусі па выніках года складзе 8%, Міжнародны валютны фонд – 6%, Еўразійскі фонд стабілізацыі і развіцця — 5,8%.
