На Нацыянальным прававым інтэрнет-партале афіцыйна апублікаваны закон аб рэспубліканскім бюджэце на 2025 год. Бюджэт сфармаваны з дэфіцытам у 4,46 млрд рублёў. Ён прадугледжвае далейшы рост выдаткаў на нацыянальную абарону, судовую ўладу, праваахоўную дзейнасць і забеспячэнне бяспекі.
У адпаведнасці з законам, даходы рэспубліканскага бюджэту ў 2025 годзе запланаваны ў памеры 45,835 млрд рублёў, выдаткі – амаль 50,3 млрд рублёў. У параўнанні з бюджэтам на 2024 год расходы павялічаны на 12,6 працэнта, даходы – на 14,9 працэнта. Памер дэфіцыту ў наступным годзе плануецца на 6,1 працэнта менш, чым у 2024.
БелАЭС ужо два тыдні не працуе, але ўлады пра гэта маўчалі
Абодва энергаблокі Беларускай атамнай электрастанцыі вось ужо два тыдні не выпрацоўваюць электрычнасць. І калі першы знаходзіцца на планавым рамонце, то другі адключаны з-за няспраўнасці контуру, які з’яўляецца носьбітам радыёактыўнага асяроддзя. Гэтую інфармацыю «Люстэрку» паведаміла крыніца, знаёмая з сітуацыяй.
У прыёмнай генеральнага дырэктара БелАЭС пацвердзілі, што другі энергаблок станцыі сапраўды не працуе, але не змаглі сказаць, з якога дня. У прыёмнай міністра энергетыкі супрацоўніца не валодала інфармацыяй.
Спыненне працы энергаблокаў станцыі не паўплывала на радыялагічную абстаноўку на прылеглых да яе тэрыторыях.
У Беларусь прыехала ў два разы больш працоўных мігрантаў, чым летась
У 2024 годзе ў Беларусі знайшлі працу каля 28,5 тысячы працоўных мігрантаў. Гэта ў два разы больш, чым было ў 2023.
Больш за ўсё прыехала грамадзян Туркменістана — каля 12,5 тысячы. Працуюць у Беларусі таксама мігранты з Расеі, Украіны, Кітая і краін Афрыкі. Усяго ў Беларусі працуюць больш за 60 тысяч іншаземцаў з больш чым 130 краін. Рост колькасці працоўных мігрантаў звязаны са зменамі заканадаўства. Як паведамілі ў МУС, 70% працоўных мігрантаў — гэта іншаземцы, якія працуюць у спрошчаным парадку. У асноўным мігранты ўладкоўваюцца на рабочыя спецыяльнасці. (Наша Ніва)
У ЕЗ забароняць продаж касметыкі ў міні-ўпакоўках і спецый у пластыку
Краіны-чальцы ЕЗ зацвердзілі новыя Палажэнні аб упакоўцы і адходах упакоўкі. Гэта элемент Еўрапейскай зялёнай здзелкі — флагманскага праекта Еўракамісіі.
Так, з 2030 года будзе дзейнічаць забарона на продаж касметыкі ў мініяцюрнай пластыкавай упакоўцы. Кетчуп, гарчыцу і вяршкі для кавы нельга будзе падаваць у аднаразовай поліэтыленавай упакоўцы. Таксама з рынку знікне пластыкавая ўпакоўка для садавіны і агародніны, якая прадаецца ў колькасці менш за 1,5 кг. ЕЗ засяродзіцца на прасоўванні шматразовай упакоўкі. З 2030 года прадаўцы ежы і напояў на вынас павінны будуць прапанаваць спажыўцам магчымасць выкарыстання ўласнай тары, піша Беларуская служба Польскага радыё.
Беларускае Радыё Рацыя
Фота ілюстрацыйнае з адкрытых крыніц
