Пасля ўводу БелАЭС цана на электраэнергію працягвае расці насуперак абяцанням уладаў.
Сярэдняя цана на электраэнергію (у разліку за 100 кВт.г) у Беларусі ў першым квартале склала 27,34 рубля — на 8,9% больш, чым за аналагічны леташні перыяд, сведчыць праведзены «Позіркам» аналіз звестак Нацыянальнага статыстычнага камітэта. Плата за 1 літр бензіну і дызельнага паліва вырасла за год адпаведна на 3,9% і на 3,8%.
Беларускія ўлады і прапаганда з моманту ідэі будаўніцтва атамнай электрастанцыі ў Астраўцы (Гарадзенская вобласць) і ў наступныя гады запэўнівалі, што ўзвядзенне АЭС вельмі выгадна для жыхароў Беларусі.
Лукашэнка шукае порт у Амане
Падчас сустрэчы Аляксандра Лукашэнкі з наследным прынцам Амана Аманам Зеязінам бен Хайтамам Аль Саідам размова зайшла пра магчымасць выкарыстання аманскага порта «Сохар» для дастаўкі беларускіх тавараў у краіны Індыйскага акіяна.
Акрамя выкарыстання партовай інфраструктуры Амана, прагучалі прапановы шчыльна папрацаваць у галіне машынабудавання, у хімічнай галіне, па прадуктах харчавання і лёгкай прамысловасці, а таксама арганізаваць прамыя рэйсы з Беларусі ў Аман.
Польская мытня канфіскавала нелегальныя шыны для Boeing
Польская мытня канфіскавала 5 тон шын для самалётаў Boeing, якія мелі транзітам прайсці праз Беларусь і Расею. Пра гэта піша Reuters. У Нацыянальнай падатковай адміністрацыі Польшчы дадалі, што гэтыя тавары падпадаюць пад санкцыі Еўразвязу.
Супрацоўнікі мытні знайшлі шыны падчас праверкі грузавіка. Вадзіцель перавозіў іх замест заяўленых шын для легкавых аўтамабіляў і аўтобусаў. Адпраўніком тавару выступіла кампанія з Іспаніі, атрымальнікам – арганізацыя з Азербайджана. У сувязі з інцыдэнтам распачата крымінальная справа, падсанкцыйны тавар – затрыманы.
Фінляндыя плануе адмовіцца ад «царскага» стандарту чыгункі
Фінляндыя хоча звузіць чыгуначную каляіну на 89 мм і перайсці на еўрапейскі стандарт, паведаміла міністр транспарту і сувязі Лулу Раннэ.
Сёння ў краіне захоўваецца стандарт чыгуначнай каляіны з часоў Расейскай Імперыі – 1524 мм. Пры гэтым шырыня еўрапейскай каляіны – 1435 мм. Замена шырыні каляіны неабходная для павышэння бяспекі грузаў і вайсковай мабільнасці, а таксама для развіцця транспамежных сувязей са Швецыяй і Нарвегіяй, сказала Раннэ. Паводле яе слоў, Еўразвяз гатовы падтрымаць фінансаванне ў памеры 50% планавання і 30% будаўніцтва новага чыгуначнага стандарту. Міністр транспарту таксама сказала, што праект разлічаны мінімум на 10 гадоў, паведамляе «Польскае радыё».
Беларускае Радыё Рацыя
Фота: delfi.lt
