Узброеныя сілы Бельгіі пры падтрымцы Францыі ўпершыню перахапілі і ўзялі пад кантроль нафтавы танкер, які належыць да так званага расейскага «ценявога флоту». Судна было адканваявана ў порт Зебрюгге для далейшага арышту.
Пра гэта паведаміў міністр абароны Бельгіі Тэа Франкен. Паводле яго слоў, цягам апошніх гадзін бельгійскія вайскоўцы пры падтрымцы французскага абароннага ведамства высадзіліся на борт нафтавага танкера, які звязваюць з расейскім «ценявым флотам».
«Судна цяпер суправаджаюць у порт Зебрюгге, дзе яно будзе канфіскавана», — напісаў Франкен.
Міністр адзначыў, што аперацыя пад кодавай назвай Blue Intruder («Сіні парушальнік») была праведзеная «надзвычай адважнай камандай вайскоўцаў».
