Кітайская кампанія Chery пачала збіраць аўтамабілі ў Расеі на трох заводах, якія вызвалілі заходнія канкурэнты, у прыватнасці Volkswagen і Mercedes, для продажу на расейскім рынку.
Пра гэта агенцтву Reuters паведамілі пяць знаёмых з сітуацыяй крыніц. Кітайскія аўтавытворцы захапілі больш за палову расейскага рынку аўтамабіляў па аб’ёмах продажаў пасля таго, як большасць заходніх кампаній пакінулі краіну ў выніку ўварвання Масквы ва Украіну ў лютым 2022 года.
Цяпер яны пашыраюць свой уплыў і на долю ўнутранай вытворчасці ў Расеі, што падкрэслівае рост ролі Пекіна ў змене прамысловага ландшафту і эканомікі Расеі пасля ўварвання.
Акрамя імпарту гатовых аўтамабіляў у Расею, Chery, на долю якой прыпадае амаль пятая частка продажаў легкавых аўтамабіляў у Расеі, таксама імпартуе амаль гатовыя аўтамабілі і завяршае іх зборку на трох расейскіх заводах, паведамілі крыніцы.
