У 2024 годзе краіны Еўразвязу імпартавалі з Беларусі прадукцыі на суму каля 1 млрд 400 млн даляраў. Гэта самы нізкі паказчык за больш чым дзесяцігоддзе.
У той жа час экспарт з Еўразвязу ў Беларусь склаў амаль 7 млрд 400 млн даляраў, нягледзячы на дзейныя санкцыі і іншыя абмежаванні з абодвух бакоў. Пра гэта паведамляе Trading Economics са спасылкай на базу дадзеных ААН па міжнародным гандлі.
Сярод асноўных тавараў, якія краіны Еўразвязу куплялі ў Беларусі, – мэбля, жывёльны і раслінны тлушч, пластмаса, электрычнае абсталяванне, угнаенні, шкло і вырабы з яго.
З Еўразвязу ў Беларусь у асноўным ішлі транспартныя сродкі, ядзерныя рэактары, фармацэўтычная прадукцыя, пластмаса, розныя хімічныя прадукты.
Нагадаем, улады Беларусі забаранілі ўвозіць з краін Еўразвязу даволі салідны спіс тавараў. Абмежавальныя меры дзейнічаюць і з боку ЕЗ — леташні пакет санкцый закранае вялікую колькасць рознай прадукцыі, якую забаранілі як купляць у беларускіх кампаній, так і прадаваць у Беларусі.
