Змякчэнне санкцый у дачыненні да Беларусі і аднаўленне экспарту калійных угнаенняў “было б вялікай памылкай”, заявіў прэм’ер-міністр Літвы Гінтаўтас Палуцкас у праграме “Інтэрв’ю Delfi”. Такім чынам ён адрэагаваў на інфармацыю сусветных СМІ пра патэнцыйнае паслабленне ўведзеных ЗША эканамічных абмежаванняў.
– Сёння рэжым Беларусі праз падаражэнне лагістыкі і дзейных санкцый не атрымлівае непасрэдна ў бюджэт амаль паўмільярда даляраў ад экспарту ўгнаенняў. Гэта значная сума, і, калі мы вернем яе ў бюджэт, не думаю, што Літве ці нашаму рэгіёну ад гэтага стане лепш, — сказаў палітык.
На думку літоўскага прэм’ера, новая адміністрацыя ЗША павінна ўлічваць не толькі патрэбу ў калійных угнаеннях, але і пагрозы бяспецы, “якія ўзнікнуць у выпадку падтрымкі эканомікі варожых краін”, піша “Позірк”.
Гандлёвая вайна ЕЗ і ЗША закране і Беларусь
Гандлёвая вайна, якая пачалася паміж ЗША з аднаго боку і Кітаем, Канадай і Еўразвязам з другога, адаб’ецца і на Беларусі, лічыць эканамічны аглядальнік выдання “Беларусы і рынак” Андрэй Махоўскі. Па словах эксперта, гандлёвыя войны — гэта заўсёды рост цэн і паскарэнне інфляцыі. А паскарэнне сусветнай інфляцыі не можа не закрануць беларускую эканоміку, бо яна не самадастатковая.
– Гэта значыць будуць даражэць імпартныя тавары, адпаведна, яны будуць даражэць і ў Беларусі, — тлумачыць эксперт.
Паводле Махоўскага, любыя гандлёвыя войны вядуць да запаволення тэмпаў сусветнага эканамічнага росту. Гэта прыводзіць да зніжэння закупак і цэн на нафту, што можа ўдарыць па беларускіх НПЗ, якія і так ужо маюць праблемы.
З 15 сакавіка падаражэе паліва
З 15 сакавіка ў Беларусі зменяцца цэны на бензін і дызельнае паліва, папярэджвае “Белнафтахім”. Цэны на АЗС павялічацца на 2 капейкі за літр паліва. У выніку з 15 сакавіка кошт кожнай з марак будзе такі:
АІ-92-К5-Еўра — 2,36 рубля;
АІ-95-К5-Еўра — 2,46 рубля;
АІ-98-К5-Еўра — 2,68 рубля;
ДТ — 2,46 рубля.
Як удакладнілі ў канцэрне «Белнафтахім», з улікам усебаковай ацэнкі эканамічнай сітуацыі, кан’юнктуры рынку нафты і нафтапрадуктаў у сумежных дзяржавах прынята рашэнне аб планавай паэтапнай карэкціроўцы цэн на нафтапрадукты на 16 капеек за літр паліва. Павышаць цэны будуць 2 капейкі ў тыдзень з 15 сакавіка.
Дональд Трамп зноў прыгразіў ЕЗ
Як паведамляе Bloomberg, прэзідэнт ЗША Дональд Трамп прыгразіў увесці 200-працэнтныя пошліны на еўрапейскія віно, шампанскае і іншыя алкагольныя напоі. Агенцтва падкрэслівае, што гэта з’яўляецца эскалацыяй гандлёвай вайны паміж ЗША і Еўразвязам.
Паводле Трампа, гэта будзе “выдатным рашэннем для кампаній па вытворчасці віна і шампанскага ў ЗША”. Трамп заявіў, што калі Еўразвяз не адменіць падатак на амерыканскі віскі, то Злучаныя Штаты пойдуць далей. Прыгадаю, што віскі трапіў пад вялікі падатак у адказ на пошліны, якія Трамп увёў на еўрапейскія сталь і алюміній.
Беларускае Радыё Рацыя.
Фота: © AP Photo/ Mindaugas Kulbis (Гінтаўтас Палуцкас).
