Прэм’ер-міністр Польшчы Дональд Туск абвясціў, што больш за 22 мільярды злотых будуць пералічаныя Польшчы як перадаплата ў рамках праграмы Еўразвязу REPowerEU. Аднак значна больш важная дэкларацыя — падача заяўкі на яшчэ 30 мільярдаў злотых у рамках першага траншу з Праграмы адбудовы. Ранейшы ўрад Матэвуша Маравецкага не мог атрымаць гэтыя грошы, таму што Брусель быў супраць уведзеных кіроўнай тады партыяй ПіС зменаў, датычных судовага заканадаўства.
Агулам Польшча атрымае 59,8 мільярдаў еўра. Гэтыя грошы не можна выдаткоўваюць на любыя мэты. Гэта сродкі, якія маюць пайсці на рэалізацыю пяці кампанентаў Плану адбудовы, сярод якіх: устойлівасць і канкурэнтаздольнасць эканомікі, зялёная энергетыка і зніжэнне энергаёмістасці, лічбавая трансфармацыя, даступнасць і якасць аховы здароўя, зялёная і разумная мабільнасць.
Пуцін просіць яйкі, Беларусь абяцае дапамагчы
Сярод галоўных тэм тыдня нельга абмінуць праблему з яйкамі, якая паўстала ў Расеі, і ў выніку якой і ў Беларусі цэны на яйкі пайшлі ўгару. Падчас прамой лініі, якая праходзіла 14 снежня, ва Уладзіміра Пуціна спыталі пра дэфіцыт яек у продажы і рост цэн на іх. За два месяцы яйкі ў Расеі падаражэлі на 30%. Пуцін адзначыў, што Беларусь прапанавала дапамагчы з яйкамі.
Калі ж глянуць на цэны на яйкі ў суседніх краінах, то сітуацыя выглядае наступным чынам. У Беларусі цэны на яйкі пачынаюцца з 2 рублёў 75 капеек. Самыя дарагія каштуюць каля 4,5 рублёў. Дзясятак курыных яек у Расеі каштуе 116 расейскіх рублёў, гэта 4 рублі 20 капеек беларускіх, то бок танней. У Польшчы цэны на дзясятак курыных яек пачынаюцца з 8 злотых (каля 6,4 рубля). У Літве дзясятак яек каштуе каля 6 беларускіх рублёў у эквіваленце, у Латвіі – больш за 5,5 рублёў.
У Беларусі пабудуць два новыя заводы
Па-першае БелАЗ пабудуе ў Оршы новы завод коштам амаль 200 мільёнаў рублёў. Гэта дазволіць ужо ў 2025 годзе вырабляць сталёвыя нарыхтоўкі для падшыпнікаў, шасцерняў і іншай прадукцыі дыяметрам да 3 метраў і масай да 3 тон, паведамляе прэс-служба прадпрыемства. Сёння такая прадукцыя ў краіне не выпускаецца, то бок гэта імпартазамяшчальны праект. Увод завода дасць магчымасць забяспечыць нарыхтоўкамі вытворчасць буйнатанажных самазвалаў. А акрамя таго, іх можна будзе пастаўляць на экспарт у тую ж Расею.
Па-другое, у Беларусі плануюць будаваць завод па вытворчасці звадкаванага прыроднага газу – праект будзе рэалізоўвацца пры ўдзеле расейскай дзяржкарпарацыі “Газпром”. Аб гэтым заявіў кіраўнік Мінэнерга Віктар Каранкевіч. Прадпрыемства размесцяць на тэрыторыі кітайска-беларускага індустрыяльнага цэнтра “Вялікі камень”.
Германія будзе канфіскаваць калядныя падарункі з Расеі
Нямецкая мытня папярэджвае, што зараз будзе канфіскоўваць калядныя і іншыя падарункі, якія перасылаюцца з Расеі. Пра гэта паведамляе сайт ведамства, звяртае ўвагу Office Life.
Забарона на ўвоз датычыцца тавараў, якія звычайна ўваходзяць у склад падарункавых пасылак. Трапілі пад абмежаванні і камяні, каштоўныя металы (золата), цыгарэты, пластмаса і хімічная прадукцыя, у тым ліку касметыка. Пры гэтым нямецкая мытня падкрэслівае, што не з’яўляюцца выключэннем і падарункавыя адпраўленні з Расеі не дойдуць да атрымальніка і ў іншых краінах Еўразвязу.
Яна Запольская, Беларускае Радыё Рацыя
