Пасля таго, як у суботу Злучаныя Штаты Амерыкі адмянілі санкцыі ў дачыненні да беларускіх калійных угнаенняў, міністэрства замежных спраў Літвы адзначыла, што ў Еўрапейскім звязе гэтае пытанне не абмяркоўваецца, перадае LRT.
«ЗША прымаюць самастойныя рашэнні пра санкцыі ў дачыненні да беларускага рэжыму, якія не звязаныя з санкцыямі з боку Еўрапейскага звязу. У ЕЗ не вядзецца ніякіх абмеркаванняў пра адмену санкцый у дачыненні да беларускага рэжыму», — гаворыцца ў каментары міністэрства.
У ім таксама падкрэсліваецца, што ні адна з прычын, паводле якіх ЕЗ пачаў прымяняць санкцыі да Беларусі, не знікла:
- унутраныя рэпрэсіі,
- ушчамленне дэмакратыі,
- інструменталізацыя міграцыі,
- дапамога Расеі ў агрэсіі супраць Украіны,
- камбінаваная гібрыдная атака.
«Вызваленне палітычных зняволеных з’яўляецца важным дыпламатычным дасягненнем, але пазіцыя Літвы застаецца нязменнай: дзеянні Беларусі наносяць вялікую шкоду бяспецы Літвы, ЕЗ і NATO», — заявілі прадстаўнікі міністэрства.
Паводле svaboda.org.
