Беларускія НПЗ з чацвёртага квартала выходзяць на ўстойлівую норму прыбытку.
Пра гэта заявіў кіраўнік Адміністрацыі Лукашэнкі Дзмітрый Крутой.
– Па нафтавым рынку ў нас усе пагадненні ўжо падпісаныя, давальніцкая нафта пачала перапрацоўвацца на нашых двух НПЗ, нафтапрадукты паступаюць у Расею. Нешта прадаецца на экспартных рынках, нешта спажываецца ў нас, таму з улікам рэалізацыі гэтай схемы нашы два заводы з чацвёртага квартала выходзяць на ўстойлівую норму прыбытку, – запэўніў чыноўнік.
Паводле Крутога, была пастаўленая задача выйсці на 7-8% рэнтабельнасці беларускімі НПЗ. І нібыта гэтая задача будзе выканана.
Wise блакуе беларусам еўрапейскія рахункі па працоўных візах D
Плацежны сэрвіс Wise патрабуе ад беларусаў, якія карыстаюцца яго еўрапейскімі картамі, прадставіць дадатковыя дакументы – ВНЖ любой краіны Еўрапейскай эканамічнай зоны або Швейцарыі. Пра гэта піша Dev.by.
Раней магчымасць адкрываць карты грамадзянам Беларусі і Расеі па працоўных візах закрылі Paysera і Revolut. Цяпер для адкрыцця еўрапейскіх карт патрэбны еўрапейскі ВНЖ. Эксперты звязваюць гэта з узмацненнем жорсткасці санкцый супраць дзвюх краін і бояззю банкаў атрымаць штрафы за парушэнне санкцый.
З’явіўся новы сэрвіс па адпраўцы грузаў з Беларусі ў Турцыю
Новы пастаянны сэрвіс па адпраўцы кантэйнерных цягнікоў са зборным грузам запусцілі паміж Беларуссю і Турцыяй. Інфармацыя пра гэта з’явілася на сайце «Белмытсэрвіса», заўважыў Office Life.
Гэта мультымадальны сэрвіс. Кантэйнерны цягнік фарміруюць у транспартна-лагістычным цэнтры “Мінск-Белмытсэрвіс-2” у Калядзічах. Затым груз едзе да порта ў Наварасійску, а далей – марскім транспартам у турэцкі порт Гебзе. Як паведамілі ў «Белмытсэрвісе», першы груз ужо адправіўся па гэтым маршруце.
Еўрапейскія краіны здымаюць абмежаванні на здабычу газу
У пачатку тыдня еўрапейскія цэны на газ паказалі адзнаку ніжэй за 28 еўра за мегават-гадзіну. Гэта былі самыя нізкія цэны з красавіка 2024 года і гэта выдатная навіна для спажыўцоў. Еўрапейскія краіны агулам мяняюць свой падыход да выкапнёвага паліва, каб знізіць выдаткі на імпарт. Да прыкладу, Грэцыя, Італія і Вялікабрытанія аднавілі разведку нафты і газу ў спадзяванні зменшыць залежнасць ад імпарту энергіі.
Прыгадаем, што праз некалькі месяцаў пасля пачатку вайны ва Украіне цэны на газ перавышалі 340 еўра за мегават-гадзіну. Яшчэ ў сярэдзіне лістапада гэтага года цэны перавышалі 31 еўра.
Беларускае Радыё Рацыя.
