Польшча пакінула свае санкцыі супраць расейскага алігарха Вячаслава Мошэ Кантара, які быў выключаны з санкцыйнага спісу ЕЗ па патрабаванні Венгрыі. Пра гэта заявіў міністр унутраных спраў Польшчы Томаш Семоняк на сваёй старонцы ў сацсетцы X.
Вячаслаў Мошэ Кантар. Фота: інстаграм
Паводле яго слоў, 15 сакавіка ён падпісаў рашэнне аб прызнанні Кантара “асобай, знаходжанне якой на тэрыторыі Рэспублікі Польшча з’яўляецца непажаданым”.
Па інфармацыі СМІ, Кантар мае цесныя сувязі з расейскім дыктатарам Уладзімірам Пуціным.
14 сакавіка ЕЗ зняў санкцыі з расейскага алігарха і яшчэ некалькіх асоб, як гэтага патрабавала Венгрыя. Адзначаецца, што з-пад санкцый вывелі алігарха Вячаслава Мошэ Кантара, сястру мільярдэра Алішэра Усманава – Гульбахор Ісмаілаву, міністра спорту РФ Міхаіла Дзегцярова і расейскага бізнесмена Уладзіміра Рашэўскага.
Акрамя таго, санкцыі былі адмененыя ў дачыненні да трох чалавек, якія лічацца памерлымі.
Таксама Люксембург заклікаў выключыць са спісу магната Міхася Фрыдмана, але на такое рашэнне Еўрапейскі Звяз не пайшоў.
